«Ўзсаноатқурилишбанк» Ўзбекистон Вазирлар Маҳкамаси муассислигида чоп этиладиган «Правда Востока» газетасида 25 октябрь куни эълон қилинган танқидий мақолага муносабат билдирди. Банк муносабати 1 ноябрь куни молия муассасасининг расмий сайтида эълон қилинган.
Мақолада «Навоий Тинч Текстил» компаниясига банкнинг Навоий вилоят филиали томонидан Хитой давлат тараққиёт банки (ХДTB)нинг кредит линиясидан кредит ажратилмаганлиги оқибатида лойиҳа барбод бўлгани, банк томонидан ХДTB кредит линияси ўрнига миллий валютада кредит ажратиш таклиф этилгани лойиҳани амалга оширишда катта тўсиқ бўлгани, мижоз банкдан бундай муносабат кутмагани ёзилган.
«Ўрганиш давомида мақолада келтирилган бирор бир ҳолат ва важлар ўз тасдиғини топмаганлиги аниқланди», — дейилади банк Ижро аппарати муносабатида. Айни вақтда, банк сайтида эълон қилинган раддияга «Навоий Тинч Текстил» компанияси раҳбари Жўрабек Холиқов томонидан «Правда Востока»га ёзилган эътироз хати илова қилинган.
Жўрабек Холиқов ўз хатида унинг компанияси ва «Ўзсаноатқурилишбанк» ўртасида «жуда яхши ҳамкорлик» йўлга қўйилгани, икки ташкилот ўртасида «тушунмовчилик ёки ҳал этиб бўлмайдиган муаммо йўқ»лигини билдирган. Шунингдек, у «Правда Востока» газетасининг Навоий вилоятидаги мухбирини танимаслиги, банк билан корхона ўртасида мақола ёзиш ҳақида ҳеч кимга мурожаат қилмаганини баён этган.
«Ушбу мақолада келтирилган ҳолат ҳақиқий вазиятга мутлақо тўғри келмайди», — деб қўшимча қилади Жўрабек Холиқов. Айни вақтда, унинг қўшимча қилишича, унинг корхонаси 2017 йил 26 октябрь куни («Правда Востока»да танқидий мақола эълон қилинганидан бир кун ўтиб) банкнинг Навоий филиалига ариза билан мурожаат қилиб, кредит олиш учун ҳужжатлар тўпламини тақдим этган.
«Мурожаатимиз банк филиали томонидан 1 кун ичида кўриб чиқилиб, Кредит комиссияси томонидан кредит ажратиш бўйича ижобий хулоса берилган ва 27 октябрь куни тасдиқлаш учун Бош банкнинг Кредит қўмитасига юборилган», — деб ёзади Жўрабек Холиқов. Холиқовнинг корхонаси ХДTBнинг кредит линиясидан 205 330 доллар миқдорида кредит олиш истагини билдирган.
«Правда Востока»нинг тегишли мақоласидан парча 1 ноябрь куни «Дарё» интернет-нашрида ҳам эълон қилинган эди. Банкнинг «Правда Востока» мақоласига муносабати «Дарё»даги хабар эълон қилингач пайдо бўлди. Банк ва «Навоий Тинч Текстил» корхонаси «Правда Востока» мақоласига нима учун фақат бир ҳафта ўтгач муносабат билдиргани ҳозирча номаълум.
Изоҳ (0)