“Toshrabot tekstil” kompaniyasi Navoiy viloyatining Qiziltepa tumani Xo‘ja Hasan qishlog‘ida to‘qimachilikka yo‘naltirilgan va barcha kommunikatsiya infratuzilmalariga ega mahobatli fabrika qurdi, deya xabar bermoqda “Pravda Vostoka Online”.
Fabrikaning birinchi navbatini sentabr oyida ishga tushirish mo‘ljallangan edi. Reja bo‘yicha, korxonadagi ishchi-xizmatchilar soni ming kishiga yetishi, ishlab chiqarilgan mahsulotning 90 foizi eksport qilinishi kerak edi.
“Biroq, moliyaviy shartnomaning bajarilmaganligi oqibatida Germaniyadan olinadigan zamonaviy uskunalar o‘z vaqtida keltirilmadi. Natijada ham vaqt, ham bozor imkoniyatlari boy berilmoqda”, — deb yozadi “Pravda Vostoka Online”.
Qayd etishlaricha, O‘zbekiston Milliy bankining Navoiy bo‘limi tomonidan taqdim qilingan kreditlash varianti korxona faoliyatiga salbiy ta’sir ko‘rsatgan — xarajatlar qismi 2 barobarga oshib, moliyaviy ahvol yomonlashgan.
Korxona mutaxassislarining ta’kidlashicha, rejalashtirilgan 300 dona tikuv mashinasining o‘rniga undan 140 dona sotib olindi. “Tabiiyki, ishchi o‘rni ham qisqarib ketdi”, — deyiladi “Pravda Vostoka Online” xabarida.
Bundan tashqari, fabrikani elektr ta’minotiga ulash ham muammo bo‘lib turibdi.
“Turli idoralarning eshiklarini qoqib, ular bilan yozishmalar olib borayotgan Qiziltepa loyihasining tashabbuskorlari qat’iyat bilan olg‘a intilmoqda. Afsuski, hozirgacha hamma harakati qumga sepilgan suvdek besamar ketmoqda”, — deb yozadi “Pravda Vostoka Online”.
E’tiborga molik tomoni, 2017-yil martida Navoiy viloyatiga tashrif buyurgan Prezidenti Shavkat Mirziyoyev mazkur fabrika loyihasi bilan tanishib, uni amalga oshirish bo‘yicha o‘z tavsiyalarini bergan edi.
Izoh (0)