Saudiya Arabistoni podshohi elektromobilda harakatlana olishi uchun Kreml saroyida o‘zgartirishlar amalga oshirildi

Saudiya Arabistoni podshohi Salmon bin Abdul Aziz as-Saudning tashrifi munosabati bilan Katta Kreml saroyining ba’zi joylariga o‘zgartirish kiritildi. O‘zgartirish 81 yoshli podshoh bino bo‘ylab elektromobilda harakatlana olishi uchun amalga oshirildi. Bu haqda “Kommersant”ga tayanib, TJournal xabar berdi.

Jurnalist Andrey Kolesnikovning so‘zlariga ko‘ra, Georgiyev zaliga olib chiquvchi asosiy zinaning ikki tarafida ushlagichlar o‘rnatilgan. Bundan tashqari, Blagoveshensk podyezdi orqali Georgiyev zaliga olib chiquvchi zinaga kirish yo‘lagi ham kengaytirilgan (bu delegatsiya a’zolari va jurnalistlar uchun mo‘ljallangan). Aynan shu yerda Saudiya Arabistoni podshohi unchalik katta bo‘lmagan elektromobilga o‘tirib, Kreml saroyi bo‘ylab harakatlangan.

Jurnalistning ma’lumotlariga ko‘ra, zinaga o‘rnatilgan ushlagichlar keksa podshohga hurmat yuzasidan o‘rnatilgan, elektromobildan foydalanish esa podshohlik delegatsiyasining tadbirni uyushtirish vaqtidagi talabi bo‘lgan.

Qirol ushbu zina orqali ko‘tarilayotganda unga hech kim yordam bera olmaydi. Uning mulozimlari buni juda yaxshi tushunadi. Biroq bunday vaziyatda hech bo‘lmasa ruhiy jihatdan madad lozim edi. Zinadagi ushlagichlar aynan shunday “madad” vazifasini bajardi.

Andrey Kolesnikov, “Kommersant” jurnalisti