Саудия Арабистони подшоҳи электромобилда ҳаракатлана олиши учун Кремль саройида ўзгартиришлар амалга оширилди

Саудия Арабистони подшоҳи Салмон бин Абдул Азиз ас-Сауднинг ташрифи муносабати билан Катта Кремль саройининг баъзи жойларига ўзгартириш киритилди. Ўзгартириш 81 ёшли подшоҳ бино бўйлаб электромобилда ҳаракатлана олиши учун амалга оширилди. Бу ҳақда «Коммерсантъ»га таяниб, TJournal хабар берди.

Журналист Андрей Колесниковнинг сўзларига кўра, Георгиев залига олиб чиқувчи асосий зинанинг икки тарафида ушлагичлар ўрнатилган. Бундан ташқари, Благовешенск подъезди орқали Георгиев залига олиб чиқувчи зинага кириш йўлаги ҳам кенгайтирилган (бу делегация аъзолари ва журналистлар учун мўлжалланган). Айнан шу ерда Саудия Арабистони подшоҳи унчалик катта бўлмаган электромобилга ўтириб, Кремль саройи бўйлаб ҳаракатланган.

Журналистнинг маълумотларига кўра, зинага ўрнатилган ушлагичлар кекса подшоҳга ҳурмат юзасидан ўрнатилган, электромобилдан фойдаланиш эса подшоҳлик делегациясининг тадбирни уюштириш вақтидаги талаби бўлган.

Қирол ушбу зина орқали кўтарилаётганда унга ҳеч ким ёрдам бера олмайди. Унинг мулозимлари буни жуда яхши тушунади. Бироқ бундай вазиятда ҳеч бўлмаса руҳий жиҳатдан мадад лозим эди. Зинадаги ушлагичлар айнан шундай «мадад» вазифасини бажарди.

Андрей Колесников, «Коммерсантъ» журналисти