Respublika baynalmilal madaniyat markazi direktori Nasriddin Muhammadiyev bugun, 5-iyul kuni Toshkentda olamdan o‘tdi, deb xabar berdi “Novosti Uzbekistana”.
Vazirlar Mahkamasi qoshidagi xorijiy davlatlar bilan millatlararo va do‘stona aloqalar bo‘yicha qo‘mitaning ma’lum qilishicha, 5-iyul kuni Nasriddin Muhammadiyev uzoq davom etgan xastalikdan so‘ng vafot etgan.
Nasriddin Muhammadiyev Respublika baynalmilal madaniy markaziga 2005-yilda rahbar etib tayinlangan. Biroq xastaligi sabab yangi qo‘mitada rahbar lavozimida ishlashga ulgurmadi. Bahorda infarktoldi holatida poytaxt shifoxonalaridan biriga yotqizilgan edi.
Nasriddin Muhammadiyev ma’lumoti bo‘yicha filolog, Yozuvchilar uyushmasi hamda O‘zbekiston Jurnalistlari uyushmasining a’zosi, O‘zbekistonda xizmat ko‘rsatgan madaniyat xodimi. 1994—1996-yillarda Tashqi ishlar vazirligida, 1996—1999-yillarda O‘zbekistonning Turkiyadagi elchixonasida matbuot kotib lavozimida ishlagan. 1999—2005-yillarda O‘zbekiston Respublikasi Prezidenti matbuot xizmatida yetakchi maslahatchi sifatida faoliyat yuritgan. 2005-yilda baynalmilal madaniyat markaziga direktor etib tayinlangan.
O‘z ishining ustasi bilan vidolashish marosimi soat 17:00da Yunusobod tumanidagi Minor qabristonida bo‘lib o‘tadi.
Izoh (0)