Normativ huquqiy hujjatlar muhokamasi portaliga Mobil aloqa xizmatlarini ko‘rsatish qoidalarning yangi tahrirdagi loyihasi joylandi, deb yozadi “Review.uz”.
Hujjatga ko‘ra, mobil aloqa xizmatlarini ko‘rsatish shartnomasi faqat abonent – jismoniy shaxs shaxsan bo‘lganda va u tomonidan pasportning asl nusxasi (yoki shaxsini tasdiqlovchi boshqa hujjat) taqdim etilganda yoki uning vakili shaxsan ishtirok etganda va u tomonidan pasportning asl nusxasi (yoki shaxsini tasdiqlovchi boshqa hujjat) va belgilangan tartibda rasmiylashtirilgan ishonchnoma taqdim etilganda tuziladi.
Shaxsni tasdiqlovchi hujjatlar bo‘lib pasport, fuqaroligi bo‘lmagan shaxsning guvohnomasi, istiqomat uchun berilgan guvohnoma, O‘zbekiston Respublikasining harbiy xizmatchilari uchun harbiy qismlar va harbiy muassasalar qo‘mondonligi tomonidan beriladigan shaxsni tasdiqlovchi hujjat yoki harbiy bilet hisoblanadi (harbiy xizmatga majbur fuqarolarning harbiy biletlaridan tashqari).
Loyihada operatordan tashqari yangi — diler kasbi joriy etilgan. U operator nomidan abonentlarga xizmat ko‘rsatish uchun operator bilan shartnoma tuzgan yuridik shaxs. Mobil aloqa xizmatlarini ko‘rsatish shartnomasini tuzishdan oldin operator (yoki diler) ushbu abonent bilan ilgari tuzilgan amaldagi shartnomalarning mavjudligini ma’lumotlar bazasi bilan solishtiradi.
Ilgari tuzilgan amaldagi shartnomalar bo‘yicha ushbu operatorning beshta va undan ortiq raqamlariga ega bo‘lgan abonent – jismoniy shaxs bilan mobil aloqa xizmatlarini ko‘rsatish shartnomasini tuzish ushbu Qoidalarda ko‘rsatilgan shartlar ta’minlanganda faqat operatorning xizmat ko‘rsatish punktlarida amalga oshiriladi.
Ushbu operatorning beshta va undan ortiq raqamlarini olish uchun abonent – yuridik shaxs bilan mobil aloqa xizmatlarini ko‘rsatish shartnomasini tuzish ushbu miqdordagi raqamlarga ehtiyojni yozma ravishda asoslab berilganda va ushbu Qoidalarda ko‘rsatilgan shartlar ta’minlanganda operatorning xizmat ko‘rsatish punktlarida amalga oshiriladi.
Loyihada quyidagi yangi terminlarni kiritish taklif qilingan:
mobil aloqa tarmog‘i operatorining dileri (bundan keyin - diler) – operator nomidan abonentlarga xizmat ko‘rsatish uchun operator bilan shartnoma tuzgan yuridik shaxs (bundan keyin – Dilerlik shartnomasi). Diler bir yoki bir nechta operatorlarning manfaatlarini ifodalashi mumkin;
o‘zini-o‘zi obro‘sizlantirgan diler – ishi davomida qonun hujjatlari, ushbu Qoidalar, dilerlik shartnomasi talablarining qo‘pol ravishda buzilishiga yo‘l qo‘ygan va ular asosida dilerlik shartnomasi bekor qilingan va diler sertifikati chaqirib olingan diler;
litsenziyaning amal qilish zonasi –litsenziya shartnomasida ko‘rsatilgan va operator mobil aloqa xizmatlarini ko‘rsatish huquqiga ega bo‘lgan hudud;
xizmat ko‘rsatish zonasi – operator litsenziya bitimi asosida mobil aloqa xizmatlarini ko‘rsatish huquqiga ega bo‘lgan va normativ-huquqiy hujjatlar bilan o‘rnatilgan shartlarga muvofiq xizmatlar sifatini ta’minlash uchun texnik imkoniyatlarga ega bo‘lgan hudud;
mobil aloqa tarmog‘ining operatori (bundan keyin - operator) – mobil aloqa tarmog‘iga ega bo‘lgan, uning qurilishi, ishlashi, rivojlanishini ta’minlovchi va litsenziyaga asosan mobil aloqa xizmatlarini ko‘rsatuvchi yuridik shaxs;
passiv abonent – shaxsiy hisobidagi mablag‘lari tugagan, ammo u bilan tuzilgan shartnoma hali bekor qilinmagan abonent;
xizmat ko‘rsatish punkti – abonentlar axborot-ma’lumot xizmatlarini olishlari, mobil aloqa xizmatlarini ko‘rsatish shartnomalarini tuzishlari va xizmatlarning boshqa turlarini olishlari mumkin bo‘lgan statsionar savdo nuqtasi va (yoki) xizmat ko‘rsatish nuqtasi;
dilerning xizmat ko‘rsatish punkti – diler tomonidan tashkil qilinadigan va foydalaniladigan xizmat ko‘rsatish punkti;
operatorning xizmat ko‘rsatish punkti – operator tomonidan tashkil qilinadigan va foydalaniladigan xizmat ko‘rsatish punkti;
shlyuz (tarmoqlararo interfeys) - turli xil arxitekturali turli protokollar va signallar formatlariga ega tarmoqlarning tarmoqlararo ulanishini ta’minlovchi apparat-dasturiy kompleks;
GSM shlyuz –mobil aloqa tarmog‘ining boshqa mobil va qayd qilingan aloqa tarmoqlari bilan o‘zaro trafik almashishini ta’minlaydigan shlyuz turi;
IP shlyuz – IP protokoliga asoslangan telekommunikatsiya tarmoqlari bilan boshqa telekommunikatsiya tarmoqlarinig o‘zaro trafik almashishini ta’minlaydigan shlyuz turi;
Loyiha o‘zgartirilishi, to‘ldirilishi yoki rad etilishi mumkin.
Izoh (0)