Норматив ҳуқуқий ҳужжатлар муҳокамаси порталига Мобил алоқа хизматларини кўрсатиш қоидаларнинг янги таҳрирдаги лойиҳаси жойланди, деб ёзади «Review.uz».
Ҳужжатга кўра, мобил алоқа хизматларини кўрсатиш шартномаси фақат абонент – жисмоний шахс шахсан бўлганда ва у томонидан паспортнинг асл нусхаси (ёки шахсини тасдиқловчи бошқа ҳужжат) тақдим этилганда ёки унинг вакили шахсан иштирок этганда ва у томонидан паспортнинг асл нусхаси (ёки шахсини тасдиқловчи бошқа ҳужжат) ва белгиланган тартибда расмийлаштирилган ишончнома тақдим этилганда тузилади.
Шахсни тасдиқловчи ҳужжатлар бўлиб паспорт, фуқаролиги бўлмаган шахснинг гувоҳномаси, истиқомат учун берилган гувоҳнома, Ўзбекистон Республикасининг ҳарбий хизматчилари учун ҳарбий қисмлар ва ҳарбий муассасалар қўмондонлиги томонидан бериладиган шахсни тасдиқловчи ҳужжат ёки ҳарбий билет ҳисобланади (ҳарбий хизматга мажбур фуқароларнинг ҳарбий билетларидан ташқари).
Лойиҳада оператордан ташқари янги — дилер касби жорий этилган. У оператор номидан абонентларга хизмат кўрсатиш учун оператор билан шартнома тузган юридик шахс. Мобил алоқа хизматларини кўрсатиш шартномасини тузишдан олдин оператор (ёки дилер) ушбу абонент билан илгари тузилган амалдаги шартномаларнинг мавжудлигини маълумотлар базаси билан солиштиради.
Илгари тузилган амалдаги шартномалар бўйича ушбу операторнинг бешта ва ундан ортиқ рақамларига эга бўлган абонент – жисмоний шахс билан мобил алоқа хизматларини кўрсатиш шартномасини тузиш ушбу Қоидаларда кўрсатилган шартлар таъминланганда фақат операторнинг хизмат кўрсатиш пунктларида амалга оширилади.
Ушбу операторнинг бешта ва ундан ортиқ рақамларини олиш учун абонент – юридик шахс билан мобил алоқа хизматларини кўрсатиш шартномасини тузиш ушбу миқдордаги рақамларга эҳтиёжни ёзма равишда асослаб берилганда ва ушбу Қоидаларда кўрсатилган шартлар таъминланганда операторнинг хизмат кўрсатиш пунктларида амалга оширилади.
Лойиҳада қуйидаги янги терминларни киритиш таклиф қилинган:
мобил алоқа тармоғи операторининг дилери (бундан кейин - дилер) – оператор номидан абонентларга хизмат кўрсатиш учун оператор билан шартнома тузган юридик шахс (бундан кейин – Дилерлик шартномаси). Дилер бир ёки бир нечта операторларнинг манфаатларини ифодалаши мумкин;
ўзини-ўзи обрўсизлантирган дилер – иши давомида қонун ҳужжатлари, ушбу Қоидалар, дилерлик шартномаси талабларининг қўпол равишда бузилишига йўл қўйган ва улар асосида дилерлик шартномаси бекор қилинган ва дилер сертификати чақириб олинган дилер;
лицензиянинг амал қилиш зонаси –лицензия шартномасида кўрсатилган ва оператор мобил алоқа хизматларини кўрсатиш ҳуқуқига эга бўлган ҳудуд;
хизмат кўрсатиш зонаси – оператор лицензия битими асосида мобил алоқа хизматларини кўрсатиш ҳуқуқига эга бўлган ва норматив-ҳуқуқий ҳужжатлар билан ўрнатилган шартларга мувофиқ хизматлар сифатини таъминлаш учун техник имкониятларга эга бўлган ҳудуд;
мобил алоқа тармоғининг оператори (бундан кейин - оператор) – мобил алоқа тармоғига эга бўлган, унинг қурилиши, ишлаши, ривожланишини таъминловчи ва лицензияга асосан мобил алоқа хизматларини кўрсатувчи юридик шахс;
пассив абонент – шахсий ҳисобидаги маблағлари тугаган, аммо у билан тузилган шартнома ҳали бекор қилинмаган абонент;
хизмат кўрсатиш пункти – абонентлар ахборот-маълумот хизматларини олишлари, мобил алоқа хизматларини кўрсатиш шартномаларини тузишлари ва хизматларнинг бошқа турларини олишлари мумкин бўлган стационар савдо нуқтаси ва (ёки) хизмат кўрсатиш нуқтаси;
дилернинг хизмат кўрсатиш пункти – дилер томонидан ташкил қилинадиган ва фойдаланиладиган хизмат кўрсатиш пункти;
операторнинг хизмат кўрсатиш пункти – оператор томонидан ташкил қилинадиган ва фойдаланиладиган хизмат кўрсатиш пункти;
шлюз (тармоқлараро интерфейс) - турли хил архитектурали турли протоколлар ва сигналлар форматларига эга тармоқларнинг тармоқлараро уланишини таъминловчи аппарат-дастурий комплекс;
GSM шлюз –мобил алоқа тармоғининг бошқа мобил ва қайд қилинган алоқа тармоқлари билан ўзаро трафик алмашишини таъминлайдиган шлюз тури;
IP шлюз – IP протоколига асосланган телекоммуникация тармоқлари билан бошқа телекоммуникация тармоқлариниг ўзаро трафик алмашишини таъминлайдиган шлюз тури;
Лойиҳа ўзгартирилиши, тўлдирилиши ёки рад этилиши мумкин.
Изоҳ (0)