Samarqand viloyat Moliya boshqarmasi boshlig‘i O‘zbekiston moliya vaziri o‘rinbosari etib tayinlandi

Abduhafiz Karimov O‘zbekiston moliya vazirining o‘rinbosari lavozimiga tayinlandi. Bu haqda O‘zbekiston Prezidenti matbuot xizmati xabar bermoqda.

Xabar berishlaricha, O‘zbekiston Prezidenti Shavkat Mirziyoyev bu haqdagi tegishli qarorni 27-iyun, seshanba kuni imzolagan. Abduhafiz Karimov 2011-yil mayidan beri Samarqand viloyati hokimligi Moliya boshqarmasi boshlig‘i lavozimida mehnat qilib kelayotgan edi.

Abduhafiz Karimov (1968-yil Samarqand viloyatida tug‘ilgan) 1993-yilda Kirovograd davlat pedagogika institutini, 1999-yilda Samarqand davlat universiteti, 2005-yilda O‘zbekiston Bank-moliya akademiyasinini tamomlagan.

U mehnat faoliyatini 1985-yilda Pastdarg‘om tumani “O‘zbekiston” jamoa xo‘jaligida ishchi sifatida boshlagan. 1993—1995-yillarda Pastdarg‘om tumani 70-maktabda o‘qituvchi, 1995—2001-yillarda Pastdarg‘om tumani dehqon-fermer xo‘jaliklari uyushmasi hisobchisi bo‘lib ishlagan.

Abduhafiz Karimov 2001—2004-yillarda Samarqand viloyati hokimligi Moliya boshqarmasi ijtimoiy-madaniy tadbirlarni moliyalashtrish bo‘limi yetakchi taftishchi-nazoratchisi, 2005—2006-yillarda shu boshqarmaning ijtimoiy soha va aholini ijtimoiy himoyalash bo‘limi boshlig‘i o‘rinbosari lavozimida mehnat qilgan.

U 2006—2007-yillarda Pastdarg‘om tumani hokimligi moliya bo‘limiga mudirlik qilgan. 2007—2009-yillarda Samarqand viloyati hokimligi Moliya boshqarmasi boshlig‘i o‘rinbosari — xalq ta’limi muassasalarini moliyalashtrish bo‘limi boshlig‘i, 2009—2011-yillarda Pastdarg‘om tumani hokimining iqtisodiyot va ijtimoiy rivojlantirish masalalari bo‘yicha o‘rinbosari lavozimilarida ishlagan.

Ma’lumot uchun, O‘zbekiston Prezidentining 23-iyundagi qarori bilan moliya vaziri o‘rinbosarlaridan biri Ahadbek Haydarov vazirlik rahbarining birinchi o‘rinbosari etib tayinlangan edi.

Vazirning avvalgi birinchi o‘rinbosari Jamshid Qo‘chqorov esa iyun oyi boshida O‘zbekiston bosh vaziri o‘rinbosari — iqtisodiy rivojlantirish, tarkibiy o‘zgartirishlar, investitsiyalar, bank va moliya tizimini isloh qilish, erkin iqtisodiy va kichik sanoat zonalari faoliyatini muvofiqlashtirish masalalari kompleksining rahbari etib tayinlangan.

Jamshid Qo‘chqorov mazkur lavozimda “O‘zbekinvest”ga bosh direktor etib tayinlangan Rustam Azimovning o‘rnini egallagan edi.