O‘zbekiston Prezidenti Shavkat Mirziyoyevning 27-iyundagi besh qarori bilan turli vazirlik va idoralar rahbarlarining yangi o‘rinbosarlari tayinlandi. Bu haqda Prezident matbuot xizmati xabar bermoqda.

Abduhafiz Karimov O‘zbekiston moliya vaziri o‘rinbosari etib tayinlandi. U bungacha Samarqand viloyat hokimligi Moliya boshqarmasiga rahbarlik qilib kelayotgan edi.

Bahodir Nizomov O‘zbekiston bandlik va mehnat munosabatlari vaziri o‘rinbosari etib tayinlandi. Bundan avval u bir muddat avval tugatilgan Mehnat vazirligida vazir o‘rinbosari sifatida ishlab kelgan.

Tohir Haydarov O‘zbekiston uy-joy kommunal xizmat ko‘rsatish vaziri o‘rinbosari etib tayinlandi. Haydarov o‘z vaqtida “O‘zkommunxizmat” agentligida boshlang‘ich kasaba uyushmasi qo‘mitasiga raislik qilgan.

Uzoqboy Begimqulov O‘zbekiston oliy va o‘rta maxsus ta’lim vazirining ilm-fan bo‘yicha o‘rinbosari etib tayinlandi. Begimqulov vazirlik huzuridagi Bosh ilmiy-metodik markazga direktorlik qilib kelayotgan edi.

Nodir Husanov O‘zbekiston avtomobil yo‘llari davlat qo‘mitasi raisining o‘rinbosari etib tayinlandi.