AQSh prezidenti Donald Tramp hukumatga kelganidan biroz vaqt o‘tgach uning ma’muriyati amerika fuqarosini ozod qilish uchun Suriya hukumati bilan aloqa kanali o‘rnatdi. Vashington AQSh fuqarosi Suriya hududida qo‘lga olingan va ushlab turilibdi, deb hisoblamoqda. Bu haqda The New York Times gazetasiga tayanib, “TASS” xabar bermoqda.
Gazetaning ma’lumotlariga ko‘ra, gap amerikalik jurnalist va sobiq harbiy xizmatchi Ostin Tays haqida ketmoqda. AQSh uni Suriya hukumati qo‘lga olgan, deb hisoblamoqda. Gazetaning o‘z manbalariga tayanib yozishicha, to‘g‘ridan-to‘g‘ri muzokaralar olib borishning iloji bo‘lmagani sababli, Vashington Suriya rasmiylari bilan maxfiy aloqa kanali tashkil qilishga qaror qilgan. Ma’lumotlarga ko‘ra, joriy yilning fevral oyida AQSh MRB direktori Maykl Pompeo Suriya maxsus xizmatlaridan birining rahbari Ali Mamluk bilan muzokara o‘kazgan. Mazkur rahbarga nisbatan inson huquqlarini buzganlikda gumon qilinib, amerika sanksiyalari qo‘llanilgan.
Taysni ozod qilish umidida Mamluk bilan muzokaralar davom ettirilganiga qaramasdan, Idlib provinsiyasida kimyoviy qurol qo‘llanilganiga javoban AQSh tomonidan Suriyaga raketa zarbalari berilganidan so‘ng aloqalar uzilgan.
AQSh ma’lumotlariga ko‘ra, Tays 2012-yilning avgustida mintaqa bo‘ylab sayohat qilayotgan vaqtda o‘g‘irlab ketilgan. Biroq Suriya rasmiylari uning qayerdaligi ularga ma’lum ekanligini rad etmoqda.
The New York Times’ning qayd etishicha, maxfiy kanal orqali muzokaralar davomida Taysni ozod qilish ssenariysi muhokama qilingan. Ssenariyga ko‘ra, Suriya hukumati Taysni qo‘lga olgani, mamlakatning immigratsiya qonunlarini buzgani uchun uni sud qilinganini tasdiqlashi kerak bo‘lgan, shundan so‘ng Bashar Asad uni afv etishi kerak bo‘lgan. Keyin esa Asad va Tramp o‘rtasida telefon muloqoti bo‘lib o‘tishi kerak bo‘lgan. Biroq yuqoridagi sabablar tufayli bundan hech narsa chiqmagan.
The New York Times’ning ta’kidlashicha, Taysni ozod qilish uchun AQSh Rossiya bilan ham muzokaralar o‘tkazgan. Muzokaralar davomida Moskva amerika tomoniga Suriya rasmiylari bilan bu masala bo‘yicha muloqot qilishda yordam berishni taklif qilgan. Biroq Moskva buning uchun AQSh qamoqxonlarida saqlanayotgan bir nechta Rossiya fuqarolarini ozod qilish shartini qo‘ygan.
Nashrning yozishicha, Vashington ismi ma’lum qilinmagan “rus josusi”ni Rossiyaning Taysni ozod qilish bo‘yicha yordami evaziga ozod qilishni xohlagan, biroq Moskva bunday taklifga javob bermagan.
Izoh (0)