IShID terrorchilik tashkilotini o‘rganuvchi eskpertlarning Reuters agentligiga ma’lum qilishicha, agarda IShID yetakchisi Abu Bakr al-Bag‘dodiyning o‘limi tasdiqlangudek bo‘lsa, uning o‘rnini Iroq prezidenti Saddam Husayn davridagi harbiy ofitserlardan biri egallaydi, deb xabar berdi “Gazeta.ru”.
Ularning so‘zlariga ko‘ra, IShID yetakchisining Saddam Husayn davrida Iroqda harbiy ofitser bo‘lgan ikkita asosiy o‘rinbosari bor.
Ekspertlar ma’lumotlariga ko‘ra, al-Bag‘dodiyning o‘rniga Iyad al-Obaydi va Ayyad al-Jumalilardan biri o‘tirishi mumkin.
Shu bilan birga, ulardan hech biriga “xalifa” unvoni, ya’ni musulmonlarning oliy qo‘mondonligi meros bo‘lib qolmaydi. Ularning fikricha, terrorchilik tashkilotining yangi yetakchisi “amir” unvonini oladi.
16-iyunda Rossiya Mudofaa vazirligi al-Bag‘dodiy yo‘q qilingan bo‘lishi mumkinligini ma’lum qilgan. Biroq idora bu ma’lumot turli kanallar orqali tekshirilayotganini ta’kidlab o‘tgan.
AQSh Mudofaa vazirligi IShID yetakchisi yo‘q qilinganini tasdiqlamadi. Al-Bag‘dodiyning yo‘q qilingani borasida o‘nlab marotaba xabar berilgan. Shunga qaramay urinishlardan hech biri ayni vaqtga qadar tasdiqlanmagan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)