O‘zbekiston Prezidenti Shavkat Mirziyoyev Farg‘ona viloyatiga tashrifi davomida Marg‘ilondan Qo‘qon shahriga poyezdda keldi. Bu haqda O‘zA xabar bermoqda.
Davlat rahbari Qo‘qon shahridagi “Shaffof metan sanoat” mas’uliyati cheklangan jamiyatida iqtisodiy loyihalar bilan tanishdi.
“Shaffof metan sanoat” MChJ tomonidan Qo‘qon shahrida siqilgan va suyultirilgan gaz ballonlar ishlab chiqarish yo‘nalishidagi zamonaviy korxona tashkil etish rejalashtirilgan. Buning uchun eski “Qo‘qonmash” zavodining bo‘sh turgan binolarida zamonaviy texnologiya o‘rnatiladi. Yiliga 100 ming dona gaz balloni ishlab chiqarish va avtotransport vositalariga o‘rnatish yo‘lga qo‘yiladi. Korxonada 30 ish o‘rni yaratiladi.
Shavkat Mirziyoyev ushbu mahsulotlarga bo‘lgan talab bilan qiziqdi. Gaz bilan yuradigan transport vositalari ko‘paysa, benzin va dizel yoqilg‘isiga talab kamayadi. Natijada sohadagi xizmatlar arzonlashadi, imkoniyatlar kengayadi, dedi Prezident.
Mahsulot tannarxini arzonlashtirish, ishlab chiqarishni ikki barobar oshirish, sohaga ixtisoslashgan mutaxassislar tayyorlash bo‘yicha ko‘rsatmalar berildi.
Qo‘qon shahrida hunarmandlikni va turizmni rivojlantirish borasida ham qator loyihalar belgilangan. Jumladan, hunarmandlik va zargarlik markazlari tashkil etish, zamonaviy mehmonxona qurish rejalashtirilgan. Ular qator soliq imtiyozlariga ega bo‘ladi, aholi bandligini ta’minlash, farovonligini oshirishda muhim ahamiyat kasb etadi.
Shaharda amalga oshirilishi rejalashtirilgan yana bir loyiha – Wi-Fi tarmog‘ini barpo etish loyihasi aholi va sayyohlarga qo‘shimcha qulaylik yaratadi.
Loyihalashtirilgan tibbiy xizmat va statsionar davolash markazi inson manfaatlarini ta’minlashga qaratilgan. Bu yerda AQShning General Electric kompaniyasidan zamonaviy tibbiy jihozlar o‘rnatiladi. Markaz yiliga 25 ming 500 kishini davolash, 500 jarrohlik amaliyoti o‘tkazish imkoniyatiga ega bo‘ladi.
Shavkat Mirziyoyev aholi salomatligi bilan bog‘liq bu majmua qurilishini tezlashtirish zarurligini ta’kidladi.
Izoh (0)