Toshkent shahrining Chilonzor tumanida noma’lum shaxslar asli qashqadaryolik bo‘lgan, hozirda vaqtincha Chilonzor tumanida yashovchi, 1982-yilda tug‘ilgan fuqaroning uyiga eshik qulfini kalit tanlash yo‘li orqali ochib kirib, u yerdan umumiy qiymati 17 million so‘mlik 7 turdagi sariq metalldan yasalgan zargarlik buyumlarini o‘g‘rilab ketgan, deb xabar berdi IIV matbuot xizmati.
Shuningdek, ular ushbu xonadonda mehmonda bo‘lgan Navoiy viloyati Qiziltepa tumanida yashovchi, xususiy tadbirkor, 1988-yilda tug‘ilgan fuqaroga tegishli ichida 2 million so‘m puli va 11 ming AQSh dollari bo‘lgan sumkani ham o‘g‘rilagan.
Ichki ishlar organlarining tezkor ko‘rgan choralari natijasida ushbu jinoyatni Toshkent shahrida yashovchi 1973 va 1974-yilda tug‘ilgan ikki nafar ayol sodir etganligi aniqlanib qo‘lga olingan.
Ularga nisbatan O‘zbekiston Respublikasi Jinoyat Kodeksining 169-moddasi 2-qismi bilan jinoyat ishi qo‘zg‘atilgan. Tergov harakatlari davom etmoqda.
Izoh (0)