Doha supermarketlari qo‘shni mamlakatlar tomonidan embargo e’lon qilingan bir paytda mahalliy ishlab chiqaruvchilarni qo‘llab-quvvatlash uchun Qatarda ishlab chiqarilgan mahsulotlarni markalashni boshladi, deb yozadi “RIA Novosti”.
Eng yirik savdo tarmoqlaridan birida Qatar mahsulotlari joylashtirilgan vitrinalarda “Qatar mahsuloti” degan yozuvlar paydo bo‘ldi. Fon sifatida davlat bayrog‘i tanlangan, shuningdek, osma yozuvda mamlakat iqtisodiyot va savdo vazirligi logotipi tasvirlangan.
Hozircha taklif etilayotgan mahsulotlar xili ko‘p emas, bular asosan yangi siqilgan sharbat, shuningdek, ko‘katlardan iborat. Mahalliy ishlab chiqaruvchilarning boshqa mahsulotlari yo‘q.
Umuman olganda Qatar supermarketlari va bozorlarida oziq-ovqat tanqisligi kuzatilmayapti — bu yerda qo‘shni mamlakatlardan keltirilgan oziq-ovqat mahsulotlarini ham, Lotin Amerikasi va Afrikadan keltirilgan mevalarni ham topish mumkin.
Mahalliy fuqarolar do‘konlarda Qatarni qo‘llab-quvvatlashi haqida e’lon qilgan Turkiya mahsulotlari ko‘payganini payqadi — turk mahsulotlari Saudiya Arabistoni, Misr va embargoga a’zo boshqa mamlakatlar mahsulotlari o‘rnini bosmoqda.
Izoh (0)