Turkiyada ovqatdan zaharlanish natijasida 730 dan ziyod harbiy xizmatchi kasalxonaga yotqizildi, deb yozadi “Korrespondent.net” mahalliy OAVlarga tayanib.
Manisa tumanidagi armiya bo‘linmalaridan birining harbiylari 17-iyun kuni tushdan keyin mazasi qochayotganidan shikoyat qila boshlagan. Askarlar bosh aylanishi va ko‘ngil aynishi belgilari bilan kasalxonaga keltirilgan. Ayni paytda ularning salomatligiga hech narsa tahdid solmayapti.
Turkiya prokuraturasi ma’lumotlariga ko‘ra, zaharlanish holatini tekshirish doirasida 21 kishi qo‘lga olingan. Mutaxassislar ekspertiza uchun harbiy qismdagi suv va boshqa materiallardan namunalar oldi.
Dastlabki ma’lumotlarga ko‘ra, zaharlanishga infeksiya sabab bo‘lgan bo‘lishi mumkin. Nashr eslatishicha, Manisada may oyida ham 590 askar ovqatdan zaharlanib, kasalxonaga tushgan edi.
Izoh (0)