Qatar unga nisbatan Saudiya Arabistoni, BAA va yana to‘qqizta davlat tomonidan e’lon qilingan iqtisodiy, moliyaviy va transport qamalining ilk oqibatlarini his qildi, deb yozadi Insider Pro. 12-iyun, dushanbadan Qatar poytaxti Dohadagi ko‘pchilik ayirboshlash punktlarida naqd dollarlar tugadi.
Amerika valyutasi hozircha bor bo‘lgan banklarda bir kishiga sotiladigan summa uchun cheklovlar kiritildi. Dohaga ishlash uchun kelgan va o‘z oilalariga pul yubormoqchi bo‘lgan ekspatlar (fuqarolikdan voz kechib, o‘z mamlakatidan tashqariga ko‘chib o‘tgan kishilar) tufayli bankomatlar qarshisida katta navbatlar yuzaga keldi.
“Bizda naqd dollar yo‘q, chunki Birlashgan Arab Amirliklaridan partiya kelmadi”, — deya ayirboshlash punktlaridan birining operatori Reuters’ga ma’lum qildi.
Yana bir bankda Gonkongdan dollar ortilgan samolyot kelishini kutishayotganini aytishdi, ammo uning qachon yetib kelishi noma’lum. Uchinchi bankdagilar esa yaqin orada dollar umuman yetkazib berilmasligini ma’lum qildi.
Bu orada Qatar riali so‘nggi 19 yil ichidagi eng past ko‘rsatkichga tushib ketdi va 3,67 dollarga teng bo‘ldi. Shu bilan birga, Qatar dunyoda neft daromadining aholi boshiga to‘g‘ri keladigan miqdori bo‘yicha birinchi o‘rinni egallaydi (yiliga 10,4 ming dollar), u bu borada Saudiya Arabistonidan ikki marta, Rossiyadan — 20 marta oldinda.
Qatar moliya vaziri Ali Sharif al-Imodiy xavotirlanish uchun hech qanday sababni ko‘rmayapti. Uning so‘zlariga ko‘ra, mamlakatning oltin-valyuta zaxiralari yalpi ichki mahsulot (35,2 milliard dollar)ning 250 foizidan oshadi. Bundan tashqari, Qatarning 350 milliard dollarlik suveren stabfondi bor.
Inqiroz kuzatilayotgan bir paytda Fitch agentligi 12-iyun, dushanba kuni Qatarning “AA” reytingini pasaytirish ehtimoli bilan qayta ko‘rib chiqishga yo‘naltirdi.
Qatardagi bunday vaziyat Doha Saudiya Arabistoni va boshqa davlatlar bilan yarashish uchun muayyan shartlarga rozilik bermagunicha davom etadi.
Izoh (0)