Қатар унга нисбатан Саудия Арабистони, БАА ва яна тўққизта давлат томонидан эълон қилинган иқтисодий, молиявий ва транспорт қамалининг илк оқибатларини ҳис қилди, деб ёзади Insider Pro. 12 июнь, душанбадан Қатар пойтахти Доҳадаги кўпчилик айирбошлаш пунктларида нақд долларлар тугади.
Америка валютаси ҳозирча бор бўлган банкларда бир кишига сотиладиган сумма учун чекловлар киритилди. Доҳага ишлаш учун келган ва ўз оилаларига пул юбормоқчи бўлган экспатлар (фуқароликдан воз кечиб, ўз мамлакатидан ташқарига кўчиб ўтган кишилар) туфайли банкоматлар қаршисида катта навбатлар юзага келди.
«Бизда нақд доллар йўқ, чунки Бирлашган Араб Амирликларидан партия келмади», — дея айирбошлаш пунктларидан бирининг оператори Reuters’га маълум қилди.
Яна бир банкда Гонконгдан доллар ортилган самолёт келишини кутишаётганини айтишди, аммо унинг қачон етиб келиши номаълум. Учинчи банкдагилар эса яқин орада доллар умуман етказиб берилмаслигини маълум қилди.
Бу орада Қатар риали сўнгги 19 йил ичидаги энг паст кўрсаткичга тушиб кетди ва 3,67 долларга тенг бўлди. Шу билан бирга, Қатар дунёда нефть даромадининг аҳоли бошига тўғри келадиган миқдори бўйича биринчи ўринни эгаллайди (йилига 10,4 минг доллар), у бу борада Саудия Арабистонидан икки марта, Россиядан — 20 марта олдинда.
Қатар молия вазири Али Шариф ал-Имодий хавотирланиш учун ҳеч қандай сабабни кўрмаяпти. Унинг сўзларига кўра, мамлакатнинг олтин-валюта захиралари ялпи ички маҳсулот (35,2 миллиард доллар)нинг 250 фоизидан ошади. Бундан ташқари, Қатарнинг 350 миллиард долларлик суверен стабфонди бор.
Инқироз кузатилаётган бир пайтда Fitch агентлиги 12 июнь, душанба куни Қатарнинг «АА» рейтингини пасайтириш эҳтимоли билан қайта кўриб чиқишга йўналтирди.
Қатардаги бундай вазият Доҳа Саудия Арабистони ва бошқа давлатлар билан ярашиш учун муайян шартларга розилик бермагунича давом этади.
Изоҳ (0)