1850-yildan beri Yer sayyorasidagi havo harorati 1 daraja Selsiyga, atmosferadagi karbonat angidrid miqdori 30 foizga ortgan. Arktikadagi muzliklar maydoni 1979-yildan har o‘n yilda to‘rt foizga qisqarmoqda, deb xabar berdi National Geographic.
Global isish oqibatida gidrometeorologik hodisalar sodir bo‘ladi. Jumladan, issiqlik va qurg‘oqchilikdan tashqari yog‘ingarchilik, suv toshqinlari, hatto g‘ayritabiiy sovuqliklar. Bunda hech qanday qarama-qarshilik yo‘q: issiq o‘lkalardagi havoning salqinlashuviga sabab Arktika hovuzidagi muzliklar maydonining qisqarishi. Muzsiz qolgan suvlar quyosh nurlarini ko‘proq o‘ziga yuta boshlaydi, shundan so‘ng atmosferaga issiqlik ko‘p tarqalib havo massasining aylanishini o‘zgartiradi.
Bundan tashqari, muzliklarning tez erishi Jahon okeani sathiga ta’sir qiladi. Olimlarning taxminicha, 2050-yilga borib global harorat 2 daraja Selsiyga oshishi hozirda sodir bo‘layotgan suv toshqinlarining ikki babobarga ortishiga olib keladi. Asr oxiriga borib ko‘plab orollar hamda materikning okean bilan chegaradosh hududlari suv ostida qoladi. Fransiyalik ikki nafar sayohatchi-suratkash suv qanday qilib Nyu-York ko‘chalariga bostirib kelishi mumkinligi haqida video tayyorlab taqdim etdi.
Video mualliflarining ta’kidlashicha, voqealar rivojining ushbu turdagi varianti haqiqatga ancha yaqin. Ko‘plab davlatlar karbonat angidrid gazini qisqartirish borasida birlashmoqda, biroq ijobiy natijalar haqida so‘zlashga hali erta. Bundan tashqari, AQSh prezidenti Donald Tramp 1-iyun kuni Parij iqlim shartnomasida ishtirok etishdan bosh tortdi, ushbu qaror oqibatida iqlim ma’lumotlarini yomon tomonga qayta ko‘rib chiqish talab etiladi.
Izoh (0)