1850 йилдан бери Ер сайёрасидаги ҳаво ҳарорати 1 даража Цельсийга, атмосферадаги карбонат ангидрид миқдори 30 фоизга ортган. Арктикадаги музликлар майдони 1979 йилдан ҳар ўн йилда тўрт фоизга қисқармоқда, деб хабар берди National Geographic.
Глобал исиш оқибатида гидрометеорологик ҳодисалар содир бўлади. Жумладан, иссиқлик ва қурғоқчиликдан ташқари ёғингарчилик, сув тошқинлари, ҳатто ғайритабиий совуқликлар. Бунда ҳеч қандай қарама-қаршилик йўқ: иссиқ ўлкалардаги ҳавонинг салқинлашувига сабаб Арктика ҳовузидаги музликлар майдонининг қисқариши. Музсиз қолган сувлар қуёш нурларини кўпроқ ўзига юта бошлайди, шундан сўнг атмосферага иссиқлик кўп тарқалиб ҳаво массасининг айланишини ўзгартиради.
Бундан ташқари, музликларнинг тез эриши Жаҳон океани сатҳига таъсир қилади. Олимларнинг тахминича, 2050 йилга бориб глобал ҳарорат 2 даража Цельсийга ошиши ҳозирда содир бўлаётган сув тошқинларининг икки бабобарга ортишига олиб келади. Аср охирига бориб кўплаб ороллар ҳамда материкнинг океан билан чегарадош ҳудудлари сув остида қолади. Франциялик икки нафар саёҳатчи-сураткаш сув қандай қилиб Нью-Йорк кўчаларига бостириб келиши мумкинлиги ҳақида видео тайёрлаб тақдим этди.
Видео муаллифларининг таъкидлашича, воқеалар ривожининг ушбу турдаги варианти ҳақиқатга анча яқин. Кўплаб давлатлар карбонат ангидрид газини қисқартириш борасида бирлашмоқда, бироқ ижобий натижалар ҳақида сўзлашга ҳали эрта. Бундан ташқари, АҚШ президенти Дональд Трамп 1 июнь куни Париж иқлим шартномасида иштирок этишдан бош тортди, ушбу қарор оқибатида иқлим маълумотларини ёмон томонга қайта кўриб чиқиш талаб этилади.
Изоҳ (0)