1998-yilda Shimoliy Irlandiyadagi nizolarga va Irlandiya respublika armiyasi tomonidan muntazam ravishda amalga oshirilgan teraktlarga nuqta qo‘ygan Belfast bitimi imzolanganidan so‘ng Buyuk Britaniyada odamlar qurbon bo‘lishiga olib kelgan to‘rtta terrorchilik harakati bo‘lib o‘tdi, deb yozadi “TASS”.
2005-yil 7-iyul kuni Londonda xudkush terrorchilar to‘rtta portlashni amalga oshirdi — mahalliy vaqt bilan 8:45 da metropolitenning uchta poyezdi hujumga uchradi, 9:47 da Tavistok-skver maydonidagi shahar avtobusi portlatib yuborildi. Natijada 52 kishi halok bo‘ldi, 700 dan ortiq kishi jarohatlandi.
Xudkushlarning barchasi Birlashgan Qirollik fuqarolari bo‘lgan, ularning uch nafari Buyuk Britaniyada ulg‘ayib, shu yerda ta’lim olgan.
Teraktlar tekshiruvi natijalariga ko‘ra, hech kim sudlanmadi. 2009-yil aprelida maslahatchilar sudi jinoyat tashkilotchilarining sheriklari deb gumon qilinayotgan uch kishini oqladi.
2013-yil 22-mayda London janubi-sharqidagi Vulij tumanida britaniyalik harbiy xizmatchi, Qirollik o‘qchilar polki barabanchisi Li Rigbi o‘ldirib ketildi. Britaniyaning asli nigeriyalik ikki fuqarosi Rigbini avtomobil bilan urib ketdi, so‘ng pichoqladi. Ikkalasi ham qotillikdan 20 daqiqa o‘tib, politsiya tomonidan qo‘lga olindi. Hodisa terakt deb baholandi, jinoyatchilarni umrbod qamoq jazosiga mahkum qilishdi.
2017-yil 22-mart kuni London markazida Vestminster ko‘prigida terrorchi boshqarayotgan avtomobil bir necha piyodani urib ketdi. So‘ng haydovchi mashinani Britaniya parlamenti yonida qoldirib, politsiyachiga pichoq bilan tashlandi va binoga kirib olishga urindi. Hujum qilgan shaxs otib tashlandi. Hodisa terakt deb baholandi. Besh kishi halok bo‘ldi, 49 kishi jabrlandi.
2017-yil 22-may oqshomida Manchester shahrida Ariana Grandening Manchester Arena yopiq stadionida tashkil etilgan konserti vaqtida portlash yuz berdi. Politsiya ma’lumotlariga ko‘ra, hodisa oqibatida kamida 19 kishi halok bo‘lgan, o‘nlab odamlar tan jarohati olgan.
Izoh (0)