Alisher Usmonov tomonidan Dmitriy Medvedevning kursdoshi rahbarlik qiluvchi “Sotsgosproyekt” jamg‘armasiga 50 million dollarlik aktivlarning berilishi Ilya Gavrilovning 2010-yilda milliarderga Rublyovkadagi yer maydonini sotgan “Ist Invest guruhi” bilan bitimning bir qismi bo‘lgan. Bu haqda Gavrilovning o‘zi ma’lum qildi, deb yozadi “RBK”.
Korrupsiyaga qarshi kurash fondi (KKF) 2-mart kuni e’lon qilgan tekshiruvda Ilya Yeliseyev hamda u bilan bog‘liq “Dar” va “Sotsgosproyekt” fondlari Medvedevning manfaatlari yo‘lida faoliyat yuritayotganligi aytiladi. Fond, Bosh prokuraturaga ushbu fonddagi qonunbuzarliklar haqida bergan arizada ta’kidlanishicha, 2010-yil avgustida “Sotsgosproyekt” biznesmen Alisher Usmonovdan xayriya shartnomasi bo‘yicha bepulga Rublyovkada joylashgan hovlini qabul qilib olgan. “Usmonovning tadbirkorlik faoliyati davlat shartnomalari, shuningdek, Medvedev qabul qiladigan normativ hujjatlarga bog‘liq bo‘lgani tufayli, 5 milliard rubllik ko‘chmas mulkning bu tarzda berilishi pora hisoblanadi”, — deyiladi arizada.
KKF Tergov qo‘mitasidan pora olish va pora berish moddalari bo‘yicha jinoiy ish qo‘zg‘ashni so‘radi.
Gavrilovning aytishicha, Alisher Usmonov o‘z qarorgohini kengaytirmoqchi bo‘lib, unga yondosh 12 gektarlik hududni sotib olish maqsadida Gavrilovga murojaat qilgan. U Ilya Yeliseyevning “Sotsgosproyekti” bilan o‘sha yerda developerlik loyihasini amalga oshirish haqida bitim tuzgani, shu tufayli, yer maydonini sota olmasligini aytgan.
Gavrilov Usmonovga shart qo‘yib, Yeliseyevning fondi bilan bog‘liq masalani tartibga solishni so‘ragan. “Agar ular loyihadan voz kechsa va siz menga yaxshi narxni taklif qilsangiz, shunda men yerni sotishga roziman”, — degan u. Usmonov “Sotsgosproyekt” bilan “yaxshigina” tovon puli haqida kelishib olgan. Shundan so‘ng yer Usmonovga sotilgan.
2010-yil 2-noyabrdagi oldi-sotdi shartnomasiga ko‘ra, Usmonov Rublyovkadagi jami hududi 11,5 gektarlik yer maydoni uchun “Ist Invest Guruhi”ga 60 million rubl yoki o‘sha vaqtdagi kurs bo‘yicha 2 million dollar to‘lagan.
Developerlik loyihasidan voz kechganligi uchun tovon puli sifatida “Sotsgosproyekt” “biz loyihani amalga oshirishdan daromad sifatida olishni ko‘zda tutgan summaga teng” aktivlarni qo‘lga kiritdi, dedi nashr suhbatdoshi Znamenskoyedagi yer maydoni va uyni nazarda tutib, aynan ular KKF tekshiruvida pora deb atalgan edi.
Izoh (0)