Buyuk Britaniya aholisining uchdan ikki qismi AQShning yangi prezidenti Donald Tramp “xalqaro xavfsizlikka tahdid soladi” deb hisoblaydi. Bu haqda “TASS” Opinium Research konsalting kompaniyasi tomonidan The Observer gazetasi buyurtmasiga ko‘ra o‘tkazilgan so‘rov natijalariga tayanib xabar berdi.
Gazetada e’lon qilingan ma’lumotlarga ko‘ra, britaniyaliklarning 64 foizi Tramp xalqaro xavfsizlikka tahdid soladi, deb hisoblaydi. So‘rovdan ma’lum bo‘lishicha, Britaniya fuqarolariga Amerika prezidenti “xavfli” (so‘rov ishtirokchilarining 50 foizi), “betayin” (39%) va “ksenofob” (notanish va begona kishilardan qo‘rqish hissiga ega bo‘lgan odam — 35%) so‘zlarini eslatadi. So‘ralganlarning yana 56 foizi AQSh yetakchisi “ishonchga munosib emas” degan fikrda.
Taxminan 44 foiz respondentlar Trampni “juda yomon prezident” bo‘ladi, deb o‘ylaydi, ularning 6 foizigina esa uni “ajoyib yetakchi” deb baholaydi.
Shuningdek, so‘ralganlarning yarmidan ko‘pi — 53 foizi Trampning joriy yilga belgilangan Britaniyaga tashrifi keyinroqqa surilishi yoki butunlay bekor qilinishi kerak, deb hisoblaydi. Britaniyaliklarning 36 foizi esa tashrif amalga oshishi kerak, degan fikrda.
Izoh (0)