Iroqda noma’lum kimsalar IShIDning bosh jallodini qatl etdi, deb yozadi The Daily Mail Iroq axborot agentliklariga tayanib.
“Noma’lum qurolli guruh 29-yanvar, yakshanba kuni IShIDning eng taniqli jallodi, Abu Sayyafning jazosini berdi, — deb yozdi agentliklardan biri mamlakat xavfsizlik kuchlaridagi manbasiga tayanib. — Uni Mosul g‘arbidagi al-Davasa tumanida aldab qo‘lga tushirishdi. Unga bir necha marta pichoq bilan zarba berilgach, u voqea joyida vafot etdi”. Boshqa ma’lumotlarga ko‘ra, Abu Sayyafni pistirmadan o‘qqa tutishgan.
Abu Sayyaf o‘z karyerasi davomida 100 dan ortiq kishini qatl etgan, shuningdek, IShIDning Naynov provinsiyasidagi bo‘linmasiga rahbarlik qilgan. U, xususan, o‘z qurbonlari boshlarini kolleksiya sifatida to‘plagani va IShID targ‘ibot videolarida ko‘p marta ko‘ringani uchun yomon ot chiqargan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)