AQSh prezidenti Donald Tramp Buyuk Britaniyaga tashrif buyurishga yo‘l qo‘ymaslik haqidagi onlayn-petitsiya mamlakat parlamenti saytida millionga yaqin imzo to‘pladi. Bu haqda “TASS” xabar bermoqda.
Hozirda jamoaviy talabnomani 860 mingdan ortiq britaniyalik imzoladi. Mazkur petitsiya bir sutkadan kamroq vaqt ichida Buyuk Britaniya tarixidagi eng shov-shuvli talabnomalar ro‘yxatida ikkinchi o‘ringa ko‘tarildi.
Birinchi o‘rinda 4 milliondan ortiq imzo to‘plagan mamlakatning Yevroittifoqda qolishi bo‘yicha ikkinchi referendum o‘tkazish haqidagi taklif turibdi.
Talabnoma matnida qayd etilishicha, “Donald Tramp Buyuk Britaniyaga AQSh davlat rahbari sifatida kelsa, kiritish kerak, biroq u rasmiy davlat tashrifi bilan kelmasligi lozim”.
Talabnoma mualliflarining fikricha, Amerika prezidentining “ayollarni tahqirlovchi fikrlari” uni Buyuk Britaniya qirolichasi tomonidan qabul qilinish huquqidan mahrum etishi zarur.
Trampning davlat tashrifiga yo‘l qo‘ymaslik haqidagi petitsiyani parlament saytiga Grem Gest degan shaxs joylashtirgan. Talabnoma bir necha soatda parlament ko‘rib chiqishi uchun zarur bo‘lgan 100 ming imzoni yig‘di.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)