Fransiyaning ko‘zoynaklar uchun linzalar va oftalmologiya qurilmalari ishlab chiqaruvchi Essilor International kompaniyasi Italiyaning, jumladan, Ray-Ban ko‘zoynaklarini ishlab chiqaruvchi Luxottica Group SpA kompaniyasini 22,8 milliard yevro (24 milliard dollar) evaziga sotib olmoqda. Bu haqda Forbes ma’lum qildi.
1961-yilda Luxottica’ga asos solgan va kompaniyaning 62 foiziga egalik qilgan 81 yoshli italiyalik milliarder Leonardo del Vekkio EssilorLuxottica deb nomlanadigan yangi kompaniya ijrochi direktori vazifasini bajaradi. Essilor direktorlar kengashi direktori, 61 yoshli Yuber Sanyer ijrochi vitse-prezident etib tayinlanadi va del Vekkio bilan bir xil huquqlarga ega bo‘ladi.
Kelishuv natijasida yuzaga keladigan va kapitallashuvi 46 milliard yevro bo‘lgan EssilorLuxottica Yevropada eng yirik ko‘zoynaklar ishlab chiqaruvchisiga aylanadi. Uning 150 mamlakatdagi xodimlari soni 140 ming kishini, yillik tushum esa 15 milliard yevroni tashkil etadi.
Bitim tuzilgani haqidagi xabarlar asnosida Luxottica aksiyalari qiymati 15, Essilor qimmatli qog‘ozlari esa 19 foizga ko‘tarildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)