Qirg‘iziston hukumati Bishkek yaqinidagi aviahalokat natijasida qurbon bo‘lganlar va jabrlanganlarning oilalariga 70 ming qirg‘iz so‘mi (1 ming dollarga yaqin)dan to‘laydi. Bu haqda hukumat majlisida respublika bosh vaziri Sooronbay Jeenbekov ma’lum qildi, deb yozadi “TASS”.
“Ushbu moddiy yordam bunday oilalarning har biriga taqdim etiladi”, — dedi bosh vazir. Avvalroq favqulodda hodisa oqibatlarini bartaraf etish bo‘yicha shtab qurbonlar oilalari respublika prezidenti Almazbek Atambayev fondidan ham 100 ming qirg‘iz so‘midan (taxminan 1,4 ming dollar) olishi haqida xabar tarqatgan edi.
Gonkong—Bishkek—Istanbul yo‘nalishida parvoz qilayotgan Turkiya kompaniyalaridan biriga tegishli Boeing 16-yanvar kuni Bishkekning Manas aeroportiga qo‘nish vaqtida yaqindagi dala-hovlilar joylashgan qishloqqa quladi. Layner 23 ta bir qavatli turar-joylarni to‘liq buzib tashladi. Qirg‘iziston FVV ma’lumotlariga ko‘ra, hodisa natijasida kamida 35 kishi, shu jumladan, ekipaj a’zolari halok bo‘ldi. Yana 13 nafar mahalliy fuqaro Bishkek kasalxonalariga yetkazildi.
Izoh (0)