Европада энг йирик EssilorLuxottica кўзойнаклар компанияси юзага келади

Франциянинг кўзойнаклар учун линзалар ва офтальмология қурилмалари ишлаб чиқарувчи Essilor International компанияси Италиянинг, жумладан, Ray-Ban кўзойнакларини ишлаб чиқарувчи Luxottica Group SpA компаниясини 22,8 миллиард евро (24 миллиард доллар) эвазига сотиб олмоқда. Бу ҳақда Forbes маълум қилди.

1961 йилда Luxottica’га асос солган ва компаниянинг 62 фоизига эгалик қилган 81 ёшли италиялик миллиардер Леонардо дель Веккио EssilorLuxottica деб номланадиган янги компания ижрочи директори вазифасини бажаради. Essilor директорлар кенгаши директори, 61 ёшли Юбер Саньер ижрочи вице-президент этиб тайинланади ва дель Веккио билан бир хил ҳуқуқларга эга бўлади.

Келишув натижасида юзага келадиган ва капиталлашуви 46 миллиард евро бўлган EssilorLuxottica Европада энг йирик кўзойнаклар ишлаб чиқарувчисига айланади. Унинг 150 мамлакатдаги ходимлари сони 140 минг кишини, йиллик тушум эса 15 миллиард еврони ташкил этади.

Битим тузилгани ҳақидаги хабарлар асносида Luxottica акциялари қиймати 15, Essilor қимматли қоғозлари эса 19 фоизга кўтарилди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.