Qozog‘istonda prezident, hukumat va parlament o‘rtasida vakolatlarni taqsimlash masalasini ko‘rib chiqish zarur. Bu haqda mamlakat prezidenti Nursulton Nazarboyev ma’lum qildi, deya xabar beradi “RBK”.
“Maxsus komissiya mazkur masalani ko‘rib chiqishi lozim. Tegishli qonunlar va bunga ehtiyoj tug‘ilsa, Konstitutsiyani o‘zgartirish yuzasidan takliflar kiritilishi kerak”, — deya ta’kidladi Nazarboyev.
Mamlakat mustaqilligining 25-yilligiga bag‘ishlangan tantanali yig‘ilishdagi chiqishi chog‘ida Nazarboyev Qozog‘iston boshqaruvning prezidentlik shaklidagi davlat bo‘lgani va kelgusida ham shunday bo‘lib qolishini bildirdi.
Qozog‘iston prezidenti yangi davlat qurilishining muvaffaqiyati birinchi galda kuchli prezidentlik boshqaruviga bog‘liq ekanini aytdi. Shu bilan birga, Nazarboyevga ko‘ra, “davlat taraqqiyotining yangi bosqichi mamlakatda ijtimoiy sohadagi ishlar uchun parlament va hukumatning mas’uliyatini oshirish masalasini qo‘ymoqda”.
Eslatib o‘tamiz, oldinroq Nursulton Nazarboyev Qozog‘istondagi boshqaruvning prezidentlik shakli mamlakatdagi hozirgi sharoitlarga to‘g‘ri kelishi, shu bois ayni paytda uni o‘zgartirishga hojat yo‘qligini bildirgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)