Qurilish va uy-joy kommunal xo‘jaligi vazirligi Toshkent shahar bosh rejasi tadbirkor taklifi yoki buyurtma asosida o‘zgarmasligini ma’lum qildi.
Avvalroq qurilish vaziri o‘rinbosari Davronjon Odilov developer Murod Nazarovning bosh rejaga o‘zgartirish kiritilayotgani haqidagi gapiga munosabat bildirib, bosh reja tadbirkorning taklifi bilan o‘zgarmasligini ma’lum qilgandi.
Murod Nazarovning aytishicha, tadbirkorlar qurilish jarayoniga xalal bergani uchun ayrim daraxtlarni kesishga majbur bo‘ladi.
“Toshkent shahri bosh rejasiga tuzatish kiritilyapti. Yaqinda chiqib qoladi, kutyapmiz. Bundan buyon poytaxtda qurilishlar yo renovatsiya, yo rekonstruksiya hududlarida bo‘ladi. Tabiiyki, bo‘sh joy yo‘q. Har bir bino atrofida daraxt bor. Daraxtlarni o‘ylamasdan kesib tashlashgani uchun katta rezonansga olib kelib, moratoriy qo‘yilgandi.
Lekin tan olish kerak, bu joylarda hatto rekonstruksiya paytida texnikani qo‘yaman desa ham, daraxtlar xalaqit beradi. Va qanaqadir yo‘llar bilan baribir ham daraxtlar kesilyapti. Cheklov qo‘yish kerak emas. Cheklovlar korrupsiyani kuchaytiradi. Imtiyozlarga ham qarshiman”, deydi biznes vakili.
“Vazir o'rinbosari bosh rejaga o‘zgartirish kiritilmaydi, deganda tadbirkorning o‘zgartirish kiritilishi rejalashtirilgan ‘korreksiyasi’ haqidagi fikriga javob bergan. Tadbirkorning taklifi yoki tadbirkor g‘oyasi bilan bosh reja o‘zgartirilmaydi. Balki bosh reja doimiy takomillashib boradigan jarayon”, deyiladi Qurilish vazirligi xabarida.
Qayd etilishicha, vazir o'rinbosari shaharning bosh rejasi takomillashuvi haqida gapirmagan. Tadbirkor nazarda tutgan shaxsiy manfaatidagi maʼlum bir o‘zgarishni nazarda tutgan.
Bosh rejani ishlab chiqishda ilmiy asoslar, shaharsozlik talablari va jamoatchilik fikri ustuvor ahamiyat kasb etadi. 1969-yilda tashkil etilgan “Toshkentboshplanliti” instituti ushbu jarayonda doimiy ravishda ilmiy izlanishlar olib boradi va doimiy ravishda Toshkent va Samarqand shaharlarining bosh rejalarini takomillashtirib boradi, deyiladi vazirlik xabarida.
Izoh (0)