Қозоғистонда президент, ҳукумат ва парламент ўртасида ваколатларни тақсимлаш масаласини кўриб чиқиш зарур. Бу ҳақда мамлакат президенти Нурсултон Назарбоев маълум қилди, дея хабар беради «РБК».
«Махсус комиссия мазкур масалани кўриб чиқиши лозим. Тегишли қонунлар ва бунга эҳтиёж туғилса, Конституцияни ўзгартириш юзасидан таклифлар киритилиши керак», — дея таъкидлади Назарбоев.
Мамлакат мустақиллигининг 25 йиллигига бағишланган тантанали йиғилишдаги чиқиши чоғида Назарбоев Қозоғистон бошқарувнинг президентлик шаклидаги давлат бўлгани ва келгусида ҳам шундай бўлиб қолишини билдирди.
Қозоғистон президенти янги давлат қурилишининг муваффақияти биринчи галда кучли президентлик бошқарувига боғлиқ эканини айтди. Шу билан бирга, Назарбоевга кўра, «давлат тараққиётининг янги босқичи мамлакатда ижтимоий соҳадаги ишлар учун парламент ва ҳукуматнинг масъулиятини ошириш масаласини қўймоқда».
Эслатиб ўтамиз, олдинроқ Нурсултон Назарбоев Қозоғистондаги бошқарувнинг президентлик шакли мамлакатдаги ҳозирги шароитларга тўғри келиши, шу боис айни пайтда уни ўзгартиришга ҳожат йўқлигини билдирганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)