Rossiyalik milliarder Roman Abramovich o‘z rafiqasi Darya Jukovaga hadya etgan sovg‘alar Forbes jurnali versiyasi bo‘yicha o‘nta eng qimmatbaho sovg‘alar ro‘yxatiga kirdi, deb yozadi “Gazeta.ru”.
Barcha davrlarning eng qimmat hadyalari reytingida birinchi pog‘onani Sikxlar davlatining so‘nggi maxarajasi Dalip Singx tomonidan 1849-yilda Britaniya qirolichasi Viktoriyaga taqdim etilgan 186 karatli “Ko‘hinur” olmosi egalladi.
Ikkinchi o‘rinda Fransiya 1770-yillarda AQSh mustaqilligi uchun olib borilgan urushda AQShga “hadya qilgan” 20 milliard dollar (hozirgi pulga chaqilganda) joylashdi. Jurnal qayd etishicha, bu yirik moliyaviy inqirozga va Fransiya inqilobiga olib kelgan.
Uchinchi pog‘onani esa 1917-yilda bankir Morton Plank tomonidan rafiqasiga sovg‘a qilingan Cartier dur marjoni band etdi. Hozirgi mezonlar bo‘yicha, zargarlik buyumi 20 million dollar turadi.
Keyingi o‘rinlarni milliarder Leonard Lauder Metropoliten-muzeyga sovg‘a qilgan 1,1 milliardlik san’at kolleksiyasi, Abramovich Jukovaga hadya etgan yuzlab million dollarlik san’at asarlari, aktyor Richard Bertonning rafiqasi Elizabet Teylorga sovg‘asi (68 karatli brilliant), Shoh Jahon rafiqasi uchun qurdirgan Tojmahal va boshqalar egalladi.
Izoh (0)