30-noyabr kuni Xitoyning Sichuan viloyatida “Titanik” nomli Atlantika layneri nusxasi qurilishi boshlandi. Yangi “Titanik” ochiq dengizga chiqmaydi — u tashrifchilari o‘zini 1912-yilgi reys yo‘lovchilaridek his qilib ko‘rishi mumkin bo‘lgan attraksionga aylanadi, deb yozadi Meduza.
“Titanik”ning uzunligi 269 metr bo‘lgan aniq nusxasi Sichuan viloyatining Dain okrugida, bo‘lajak kurort hududida quriladi. Sichuanning dengizga chiqish yo‘li yo‘q: kema nusxasi daryo qirg‘og‘ida quriladi va uni suvga tushirish rejalashtirilmagan. Yangi “Titanik”, katta ehtimol bilan, 1912-yilda cho‘kib ketgan kema ko‘rinishi va interyerini takrorlovchi mehmonxona bo‘ladi.
Qurilish ishlari bir milliard yuan (145 million dollar)ga baholanmoqda. Qurilish aynan qachon yakuniga yetishi noma’lum. Atom suvosti kemalari va harbiy kemalar ishlab chiqarishga ixtisoslashgan Wuchang Shipyard kompaniyasi 2017-yil avgustiga qadar “Titanik”ning barcha qismlarini tayyorlab berishi, shundan so‘ng mashhur kemaning nusxasi yig‘ilishi kutilmoqda.
Sichuan viloyati ma’muriyati yangi attraksion yordamida hududga sayyohlarni jalb qilmoqchi. Qurilishga Toni Bler va Gordon Braun hukumatlarida ishlagan britaniyalik sobiq vazir Piter Mendelson ko‘mak bermoqda. Qurilishni boshlash marosimida Mendelson ham qatnashdi va qurilishni tarixiy voqea, deb atadi. Bu sobiq vazir — Buyuk Britaniyada Xitoy manfaatlarini faol ilgari suruvchi shaxslardan biridir. U hatto 2008-yili, butun dunyo bo‘ylab Xitoy sut mahsulotlari sog‘liq uchun xavfli degan xavotir bilan taqiqlangan bir vaqtda, Xitoyda ishlab chiqarilgan qatiqni namoyishkorona ichgan edi.
Sichuandagi “Titanik”ning nusxasi — eng mashhur okean laynerini qayta tiklash bo‘yicha ikkinchi loyiha; birinchisi ham Xitoyda amalga oshirilayotgan edi. Avstraliyalik milliarder Klayv Palmer 2012-yili Xitoy kemasozlik portida dengizga chiqib, uzoq muddatli safarlarda suza oladigan “Titanik”ning aniq nusxasini qurdirishni rejalashtirayotganini ma’lum qilgan edi. Xavfsizlik nuqtai nazaridan va kemasozlikning zamonaviy talablariga muvofiq, “Titanik II” loyiha bo‘yicha originaliga nisbatan bir necha metrga kengroq bo‘lishi lozim edi.
Loyihani ishlab chiqishga eng kuchli titanikshunoslar jalb etildi, 2013-yili kemaning 10 metrlik modeli sinovdan o‘tkazildi. Oradan uch yil o‘tib, Palmer moliyaviy muammolarga duch keldi va qurilish noma’lum muddatga qoldirildi. Aslida qurilish ishlari boshlanmagan, boz ustiga, Palmer tanlagan kemasozlik porti texnik talablar bo‘yicha Xitoy tarixidagi ilk yo‘lovchi laynerini qurish uchun javob bermasligi yuzasidan xavotirlar bildirilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)