Tadbirkorlar va ishbilarmonlar harakati – O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyevning ishonchli vakili Q.Sanaqulov Zarafshon shahri saylovchilari bilan uchrashdi. Bu haqda O‘zA xabar bermoqda.
Uchrashuvda Prezidentlikka nomzodning ishonchli vakili yig‘ilganlarni Shavkat Mirziyoyevning tarjimai holi va saylovoldi dasturi bilan tanishtirdi.
Dasturda davlat va jamiyat boshqaruvi tizimini takomillashtirish, qonun ustuvorligini ta’minlash va sud-huquq tizimini isloh etish, iqtisodiy islohotlarni chuqurlashtirish, makroiqtisodiy barqarorlik va izchil o‘sish sur’atlarini ta’minlash, ijtimoiy sohani rivojlantirish, mamlakatda tinchlik va hamjihatlikni yanada mustahkamlashga qaratilgan ustuvor vazifalar belgilangan.
Ijro hokimiyati faoliyati samaradorligini oshirish, jamoatchilik nazorati mexanizmlarini kuchaytirish, sud hokimiyatining mustaqilligini va odil sudlovni ta’minlash, iqtisodiyotni modernizatsiya va diversifikatsiya qilish, mahalliy budjetlarning daromad bazasini kengaytirish, xususiy mulk va tadbirkorlikni rivojlantirish, ozuqabop va eksportbop ekinlarni ko‘paytirish, aholi bandligini ta’minlash, aholi farovonligini yuksaltirish kabi muhim masalalar o‘z ifodasini topgan.
“Tomdi mash’ali” fermer xo‘jaligi raisi M.Nazarov, Zarafshon sanoat kasb-hunar kolleji o‘qituvchisi Sh.Muhammadiyev, Zarafshon shahridagi “Navro‘z” mahalla fuqarolar yig‘ini diniy ma’rifat va ma’naviy-axloqiy tarbiya masalalari bo‘yicha maslahatchisi N.Rahmatova va boshqalar nomzodning dasturida belgilangan ustuvor vazifalar xususida fikr bildirdi.
Uchrashuvda nomzodning ishonchli vakili saylovchilarning savollariga atroflicha javob qaytardi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)