Rossiyaning “Nezavisimaya gazeta” nashri 28-noyabr, dushanba kungi sonida “O‘zbekiston Prezident sayloviga tayyorgarlik ko‘rmoqda” nomli maqola e’lon qildi.
Unda, jumladan, shunday deyiladi:
“O‘zbekistondagi prezident saylovi muddatidan avval bo‘lib o‘tmoqda. O‘zbekiston xalqi og‘ir judolik — Birinchi Prezident Islom Karimov vafotini boshidan o‘tkazdi. Biroq jamiyatni isloh qilish strategiyasi saqlab qolindi, hokimiyatning vorisiylik xususiyati ta’minlanadi. Mamlakat fuqarolariga ko‘ra, eng asosiysi O‘zbekistonda tinchlik-osoyishtalikni asrash. Respondentlarning 41,2 foizi saylovdan nimani kutayotgani haqidagi savolga shunday javob bergan. So‘rovda qatnashganlarning 95 foizi ovoz berishda albatta ishtirok etishini bildirgan. Ulardan 41,3 foizi buni fuqarolik burchi, 31,8 foizi yurt kelajagi uchun mas’uliyat, 21,3 foizi esa fikrini bildirish va munosib nomzodni tanlash imkoniyati bilan izohladi.
2016-yilgi saylov kampaniyasining ajralib turuvchi xususiyati sifatida prezidentlikka nomzodlar o‘rtasida real raqobatni ko‘rsatish mumkin. Bunda davlat rahbarini saylash jarayonini tartibga soluvchi qator normativ aktlar, xususan, “O‘zbekiston Respublikasi Prezidenti saylovi to‘g‘risida”, “Fuqarolarning saylov huquqi kafolatlari to‘g‘risida”, “O‘zbekiston Respublikasi Markaziy saylov komissiyasi to‘g‘risida” va boshqa qonunlar qabul qilingani muhim omil bo‘lmoqda.
Xalq tomonidan saylangan parlamentning roli va mas’uliyati oshgani haqida gapirganda “Parlament nazorati to‘g‘risida”gi qonunni qabul qilinganini alohida ta’kidlash lozim. Hozirda qonun chiqaruvchi organ qo‘mitalari tomonidan hukumat a’zolari faoliyati haqida hisobot beradigan parlament eshituvlarini o‘tkazilishi odatiy holga aylandi. Qolaversa, 2015-yilda O‘zbekiston Senati maxsus qonun bilan prokuratura organlari faoliyati ustidan parlament nazoratini o‘rnatish vakolatiga ega bo‘ldi.
“Elektron hukumat to‘g‘risida”gi qonun aholi va biznesning davlat idoralari bilan interaktiv aloqada bo‘lishi uchun imkoniyat yaratilishini ko‘zda tutadi. Hujjatda xalqaro qonunchilik va AQSh, Germaniya, Avstriya, Janubiy Koreyaning ilg‘or tajribasi inobatga olingan. Shuningdek, respublika hukumati rahbari fuqarolar va yuridik shaxslar murojaati uchun virtual qabulxona ochdi. Endilikda ariza, shikoyat va takliflarni bosh vazirga to‘g‘ridan-to‘g‘ri sayt orqali jo‘natish yoki telefon orqali bildirish mumkin”.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)