O‘zbekiston xalqaro kommunikatsiya tarmoqlariga integratsiyalangan zamonaviy yo‘l-transport infratuzilmasini yaratish bo‘yicha strategiyani amalga oshirishda davom etadi. Bu haqda 26-noyabr, shanba kuni O‘zbekiston Bosh vaziri birinchi o‘rinbosari va Moliya vaziri Rustam Azimov Ashxobodda bo‘lib o‘tgan BMTning barqaror transport bo‘yicha Birinchi Global anjumanida aytib o‘tdi, deb yozadi UzDaily.
O‘zbekistonning transport kommunikatsiyalari va ushbu sohadagi xalqaro hamkorlikni rivojlantirishning asosiy istiqbollari haqidagi tushunchalari borasida gapirar ekan, Azimov transport tarmoqlari va logistika infratuzilmasini rivojlantirish bo‘yicha chuqur o‘ylangan uzoq muddatli milliy dasturlarni amalga oshirish kerakligini ta’kidladi.
“Uzoq muddatli istiqbolda transport kommunikatsiyalari va tranzit quvvatlarini rivojlantirish O‘zbekiston barqaror iqtisodiy taraqqiyotining eng muhim omillaridan biri bo‘lib qolishini juda yaxshi tushunamiz”, — deya qayd etdi Azimov.
“Shu tufayli O‘zbekiston Prezidenti vazifasini bajaruvchi Shavkat Mirziyoyev mamlakatda olib boriladigan tuzilmaviy islohotlarning birlamchilaridan biri sifatida xalqaro kommunikatsiya tarmoqlariga integratsiyalangan zamonaviy yo‘l-transport infratuzilmasini yaratish bo‘yicha strategiyani amalga oshirishni davom ettirishni belgiladi”, — deya qo‘shimcha qildi O‘zbekiston Bosh vaziri o‘rinbosari.
Izoh (0)