Qodirov farzandlariga nohaq tarzda yuqori baho qo‘ygan o‘qituvchi ishdan haydalishini aytdi

Checheniston rahbari Ramzan Qodirov maktabda uning farzandlariga nohaq tarzda yuqori baho qo‘ygan o‘qituvchi ishdan haydalishini va mintaqada boshqa ishlamasligini aytdi, deb yozadi “TASS”.

“Agar mening farzandimga nohaq tarzda yuqori baho qo‘yishsa, ushbu o‘qituvchi respublikada ishlamasligi uchun qo‘limdan kelganini qilardim. Bolalarni xafa qilish nimaga kerak? Qosh qo‘yaman deb, ko‘z chiqarish kerak emas, ularning o‘zlari barcha narsaga erisha oladi”, — dedi Qodirov nashrga bergan intervyusida.

Checheniston rahbari so‘zlariga ko‘ra, u farzandlari Qur’on o‘qishidan eng ko‘p faxrlanadi.

“Adam Qur’on o‘qishni uch yoshidan boshlagan. Arab tilidagi olti yuz sahifa matn. Yoddan! Parallel tarzda rus tili, ingliz tili, sport, raqs bilan shug‘ullangan. Bolalarga Qur’onni yod olish imkonini berganimdan faxrlanaman”, — deya ta’kidladi Qodirov.