Fransiyaning sobiq bosh vaziri Fransua Fiyon 68 foiz ovoz to‘plab, o‘ng markazchi muxolifat praymerizining ikkinchi bosqichi yakunlari bo‘yicha yetakchilik qilmoqda. Mamlakatdagi saylov uchastkalarining yarmidan ortig‘ida byulletenlar hisoblab chiqilganidan so‘ng e’lon qilingan dastlabki ma’lumotlar shundan dalolat bermoqda. Bu haqda “TASS” xabar berdi.
Fiyonning praymeriz ikkinchi bosqichidagi raqibi, Bordo shahri meri Alen Jyuppe 31,6 foiz ovoz to‘plab, katta farq bilan ortda qolmoqda. Fiyonning yakuniy natijasi joriy raqamlardan ko‘ra birmuncha pastroq bo‘lishi kutilmoqda, chunki Jyuppe qo‘llab-quvvvatlanish darajasi yuqori bo‘lgan Fransiyaning yirik shaharlaridagi ma’lumotlar tizimga oxirgi navbatda yetib keladi. Shu bilan birga, Fiyonning ishonarli g‘alabasi hozirning o‘zida hech kimda shubha uyg‘otmayapti.
Fransiyada prezidentlik saylovi 2017-yil bahorida bo‘lib o‘tadi. Aynan praymeriz natijalari bo‘yicha aniqlanadigan o‘ng markazchi nomzodning mazkur saylovda g‘alaba qozonish ehtimoli yuqori baholanmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)