Франциянинг собиқ бош вазири Франсуа Фийон 68 фоиз овоз тўплаб, ўнг марказчи мухолифат праймеризининг иккинчи босқичи якунлари бўйича етакчилик қилмоқда. Мамлакатдаги сайлов участкаларининг ярмидан ортиғида бюллетенлар ҳисоблаб чиқилганидан сўнг эълон қилинган дастлабки маълумотлар шундан далолат бермоқда. Бу ҳақда «ТАСС» хабар берди.
Фийоннинг праймериз иккинчи босқичидаги рақиби, Бордо шаҳри мэри Ален Жюппе 31,6 фоиз овоз тўплаб, катта фарқ билан ортда қолмоқда. Фийоннинг якуний натижаси жорий рақамлардан кўра бирмунча пастроқ бўлиши кутилмоқда, чунки Жюппе қўллаб-қуввватланиш даражаси юқори бўлган Франциянинг йирик шаҳарларидаги маълумотлар тизимга охирги навбатда етиб келади. Шу билан бирга, Фийоннинг ишонарли ғалабаси ҳозирнинг ўзида ҳеч кимда шубҳа уйғотмаяпти.
Францияда президентлик сайлови 2017 йил баҳорида бўлиб ўтади. Айнан праймериз натижалари бўйича аниқланадиган ўнг марказчи номзоднинг мазкур сайловда ғалаба қозониш эҳтимоли юқори баҳоланмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)