O‘zbekiston Axborot-kommunikatsiya texnologiyalari taraqqiyoti indeksida 110-o‘rinni saqlab qoldi, deya xabar bermoqda UzDaily. Xalqaro elektr aloqa ittifoqi 22-noyabr kuni “Axborot jamiyati o‘lchovi” nomi ostidagi yillik hisobotni taqdim etdi.
Hisobotga ko‘ra, O‘zbekiston AKT indeksida 4,05 ko‘rsatkichi bilan 110-o‘rinni egalladi. MDH mamlakatlari orasida esa 9-o‘rinni band etdi. O‘zbekiston o‘tgan yili ham hisobotda 110-o‘rinda joylashgan edi, ammo o‘shanda uning ko‘rsatkichi 3,76 ga teng edi.
AKT taraqqiyoti indeksi AKTning mavjudligi, undan foydalanish va amaliy ko‘nikmalar kabi uchta quyi indeksdan iborat. Ayni paytda hisobotda dunyoning 175 ta mamlakatiga tegishli natijalar aks etgan.
AKTning mavjudligi quyi indeksi bo‘yicha O‘zbekiston 4,53 ko‘rsatkichi bilan 112-o‘rinni egalladi. Undan foydalanish quyi indeksida 113 (2,58), amaliy ko‘nikmalar quyi indeksi bo‘yicha esa 87-o‘rinni (6,04) band etdi.
Hisobot ma’lumotlariga ko‘ra, statsionar telefon aloqasiga ulanganlar soni har 100 kishiga 8,44 ni, mobil aloqasiga ulanganlar esa — har 100 kishiga 73,34 ni tashkil qiladi. Xalqaro trafik har bir foydalanuvchi boshiga 2075,36 bit/soniyadan iborat.
O‘zbekistonda uy xo‘jaliklarining qariyb 43,2 foizi kompyuterlarga ega, 52,6 foizi esa internetga ulangan.
Shu bilan birga, aholining 42,8 foizi internetdan foydalanadi. Statsionar keng polosali internetdan foydalanuvchilar soni har 100 kishiga 3,57 ni tashkil etadi. Faol mobil internet foydalanuvchilari soni esa O‘zbekistonda har 100 kishiga 28,69 ga yetdi.
Izoh (0)