Ўзбекистон Ахборот-коммуникация технологиялари тараққиёти индексида 110-ўринни сақлаб қолди, дея хабар бермоқда UzDaily. Халқаро электр алоқа иттифоқи 22 ноябрь куни «Ахборот жамияти ўлчови» номи остидаги йиллик ҳисоботни тақдим этди.
Ҳисоботга кўра, Ўзбекистон АКТ индексида 4,05 кўрсаткичи билан 110-ўринни эгаллади. МДҲ мамлакатлари орасида эса 9-ўринни банд этди. Ўзбекистон ўтган йили ҳам ҳисоботда 110-ўринда жойлашган эди, аммо ўшанда унинг кўрсаткичи 3,76 га тенг эди.
АКТ тараққиёти индекси АКТнинг мавжудлиги, ундан фойдаланиш ва амалий кўникмалар каби учта қуйи индексдан иборат. Айни пайтда ҳисоботда дунёнинг 175 та мамлакатига тегишли натижалар акс этган.
АКТнинг мавжудлиги қуйи индекси бўйича Ўзбекистон 4,53 кўрсаткичи билан 112-ўринни эгаллади. Ундан фойдаланиш қуйи индексида 113 (2,58), амалий кўникмалар қуйи индекси бўйича эса 87-ўринни (6,04) банд этди.
Ҳисобот маълумотларига кўра, стационар телефон алоқасига уланганлар сони ҳар 100 кишига 8,44 ни, мобил алоқасига уланганлар эса — ҳар 100 кишига 73,34 ни ташкил қилади. Халқаро трафик ҳар бир фойдаланувчи бошига 2075,36 бит/сониядан иборат.
Ўзбекистонда уй хўжаликларининг қарийб 43,2 фоизи компьютерларга эга, 52,6 фоизи эса интернетга уланган.
Шу билан бирга, аҳолининг 42,8 фоизи интернетдан фойдаланади. Стационар кенг полосали интернетдан фойдаланувчилар сони ҳар 100 кишига 3,57 ни ташкил этади. Фаол мобил интернет фойдаланувчилари сони эса Ўзбекистонда ҳар 100 кишига 28,69 га етди.
Изоҳ (0)