O‘zbekistonda bo‘lib o‘tadigan Prezident saylovi xalqaro hamjamiyat diqqat markazida bo‘lib, ijtimoiy-siyosiy, ekspert-tahliliy, ilmiy-akademik doiralarda va ommaviy axborot vositalarida keng muhokama qilinmoqda. “Jahon” axborot agentligi mazkur muhokamalarga e’tibor qaratdi.
Robert Blum, Jeneva diplomatik korpusi prezidenti (Shveysariya):
— O‘zbekistonda ochiqlik va demokratik ruhda kechayotgan saylovoldi kampaniyasi davlat boshqaruvi va mamlakat aholisining siyosiy madaniyatini oshirishda muhim ahamiyat kasb etadi.
Saylovda 4 siyosiy partiyadan nomzodlarning ishtirok etishi va bu jarayonda transparentlikni ta’minlash bo‘yicha amalga oshirilgan tadbirlar mamlakatda siyosiy barqarorlikning va qonun ustuvorligi kafolatlarining yanada mustahkamlanishiga xizmat qiladi, deb hisoblayman.
To‘rtta siyosiy partiyaning ham saylovoldi dasturlarini tahlil etish shuni ko‘rsatadiki, ularning barchasi ham fuqarolarning huquq va manfaatlarini ta’minlash, mamlakatni iqtisodiy rivojlantirish va ijtimoiy farovonlikka erishishni ko‘zda tutadi. Nazarimda, ular bir-birini to‘ldiradi va kelajakda ushbu ovoz berish yakunlanganidan so‘ng, saylovoldi dasturlarining qay biri amalga oshirilmasin, mamlakatda mavjud umumiy siyosiy holat aniq iqtisodiy va moliyaviy istiqbollarni ochadi hamda xorijiy hamkorlarni O‘zbekistonga sarmoya kirgizishini rag‘batlantiradi.
Yeji Shukalskiy, Lyublin universiteti va Xelm Xalqaro munosabatlar va ijtimoiy kommunikatsiyalar oliy maktabi professori (Polsha):
— So‘nggi yillar davomida turli mamlakatlar siyosiy tizimlarini tadqiq qilish va parlamentlari faoliyatlari tahlili bilan shug‘ullanib kelmoqdaman. Yaqinda o‘zbek parlamentarizmi shakllanishining asosiy bosqichlari o‘z aksini topgan Oliy Majlis tizimi, uning vazifalari va faoliyatiga bag‘ishlangan monografiyam e’lon qilindi.
Bo‘lib o‘tadigan Prezident saylovi, shaxsiy kuzatuvimga ko‘ra, xalqaro me’yorlarga to‘la mosligi bilan birga, o‘zbek jamiyatining o‘ziga xos jihatlarini ham namoyon etadi. Saylovoldi jarayonlar muhim bosqich bo‘lib, mazkur siyosiy tadbirning xususiyati va natijasini, uning transparentlik darajasi va nomzodlarning siyosiy malakalarini ko‘rsatib beradi.
O‘zbekiston siyosiy partiyalari va fuqarolari saylovga tayyorgarlik ko‘rish hamda uni o‘tkazish borasida teng huquq va imkoniyatlar bilan ta’minlanganini ham alohida qayd etish lozim.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)