O‘zbekiston Prezidenti sayloviga taklif etilgan xalqaro kuzatuvchilar o‘z ishlariga kirishib, diplomatik vakolatxonalarda ochilgan saylov uchastkalariga bormoqda, saylovlarga tayyorgarlik va ularni o‘tkazish jarayoni bilan qiziqmoqda. Ulardan ayrimlari “Jahon” axborot agentligi bilan taassurot va mulohazalarini o‘rtoqlashdi.
— O‘zbekiston Prezidenti sayloviga tayyorgarlikning borishi menga ma’qul. Markaziy saylov komissiyasi saylov o‘tkaziladigan sana va saylov kampaniyasi boshlanganidan beri katta ishlarni amalga oshirdi. Komissiyaning dastlabki qadamlaridan biri nufuzli xalqaro tashkilotlardan kuzatuvchilarni taklif etish bo‘ldi.
O‘zbekistonning xalqaro obro‘si oshib borayotganini inobatga olib, dunyoning ko‘plab mamlakatlari o‘z kuzatuvchilarini jo‘natishiga ishonaman. O‘zim bu yerdagi turli saylov kampaniyalarida bir necha bor qatnashdim. Bu galgi ishtirokim bo‘lajak prezidentlik saylovida ochiqlik va oshkoralik tamoyillari ta’minlanishini xolis baholashga hissa qo‘shadi, deb umid qilaman, — deya ta’kidladi AQSh va Kanada Buxoro yahudiylari Kongressi prezidenti Boris Qandov.
— Mamlakatda va xorijda saylovni yuqori darajada o‘tkazish yuzasidan faol ish olib borilmoqda. OAV orqali aholiga saylovlarga tayyorgarlik bo‘yicha ma’lumotlarni to‘liq taqdim etishga alohida e’tibor qaratilmoqda, — deydi Hindistondagi Javoharla’l Neru nomli Rossiya va Markaziy Osiyo tadqiqotlari markazi direktori professor Sanjay Kumar Pandey. — O‘zbekistonda yuz berayotgan hodisalar nafaqat Markaziy, balki Janubiy Osiyo uchun ham salmoqli ahamiyat kasb etadi. Tinchlik, barqarorlik mamlakatning iqtisodiy taraqqiyoti va gullab-yashnashi uchun xizmat qiladi. Shu sababli prezidentlik saylovining osoyishtalik, tartib bilan o‘tkazilishi eng muhim omillardan biri.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)