“Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni talablaridan kelib chiqib, Davlat bojxona qo‘mitasi va hududiy bojxona boshqarmalari rahbariyati tomonidan aholi hamda tadbirkorlar uchun kunlik soat 8 dan 17 gacha shaxsiy qabullar tashkil qilinmoqda. Bu haqda “Daryo”ga qo‘mita axborot xizmati ma’lum qildi.
Aholi va tadbirkorlar tomonidan murojaatlarni o‘z vaqtida va tezkorlik bilan ko‘rib chiqish maqsadida Davlat bojxona qo‘mitasi veb-saytidagi “Savol yo‘llash” xizmati negizida “Virtual qabulxona” tashkil qilindi. Davlat bojxona qo‘mitasi veb-sayti orqali tez-tez yo‘llanadigan dolzarb savollar va ularning javoblari saytning “So‘ragan edingiz!” rukni orqali e’lon qilib borilmoqda.
Veb-saytda bojxona organlarining respublika (120-76-33) va viloyatlar miqyosida faoliyat olib borayotgan barcha ishonch telefonlari, tadbirkorlar va TIF ishtirokchilari uchun joriy qilingan doimiy ishonch telefoni (120-76-27) raqamlari alohida sahifada joylashtirilgan. Joriy yilning o‘tgan davri mobaynida Davlat bojxona qo‘mitasi ishonch telefonlariga 44 ta murojaat kelib tushdi.
Joylarda aholi va tadbirkorlik subyektlari bilan ishlashni tubdan qayta ko‘rib chiqish va ularning muammolari va e’tirozlarini joyida hal etish, aholi bilan ishlash madaniyatini oshirish maqsadida DBQ rahbariyatining Qoraqalpog‘iston Respublikasi, viloyatlar va Toshkent shahrida jismoniy va yuridik shaxslarni sayyor qabul qilish, ularni qiziqtirgan savollarga javob topish hamda mavjud muammolarni yechish bo‘yicha uchrashuvlari tashkil etilmoqda. 2016-yilning 10 oyi davomida DBQ rahbariyati tomonidan jami 115 marotaba jismoniy shaxslar yoki yuridik shaxslarning vakillari qabul qilinib, ko‘tarilgan masalalari ijobiy hal etildi.
Joriy yilning o‘tgan 10 oyi davomida DBQga jismoniy va yuridik shaxslardan jami 959 ta murojaat kelgan. Shundan 412 tasi yoki 42,9 foizi Yagona interaktiv davlat xizmatlari portali orqali kelib tushdi.
Murojaatlar tahlili shuni ko‘rsatadiki, bojxona xodimlarining noqonuniy harakatlari bo‘yicha 85 ta, ishdan (o‘qishdan) noqonuniy bo‘shatilganligi va ishga (o‘qishga) tiklash to‘g‘risida 149 ta, bojxona nazoratini o‘tkazish va rasmiylashtiruv to‘g‘risida 485 ta, bojxona to‘lovlaridan ozod qilish va imtiyozlar to‘g‘risida 91 ta, musodara etilgan tovar-moddiy boyliklari yoki jarimalarni qaytarish to‘g‘risida 31 ta va 118 ta boshqa masalalarga doir murojaat kelib tushdi.
O‘zbekiston Respublikasi Bosh vazirining virtual qabulxonasi orqali joriy yil 10-noyabriga qadar jismoniy va yuridik shaxslardan bojxona organlariga 241 ta (jismoniy shaxslardan 204 ta, yuridik shaxslardan 37 ta) murojaat kelib tushdi. Ularning 92 tasi bojxona organlarida ishga yoki o‘qishga tiklash masalalarini qamrab olgan bo‘lsa, bojxona nazorati va rasmiylashtiruvi, bojxona imtiyozlarini qo‘llashga doir murojaatlar 63 tani tashkil qildi. Murojaatlarning 43 tasi esa musodara etilgan tovar-moddiy boyliklari yoki jarimalarni qaytarish to‘g‘risida, 27 tasi bojxona xodimlarining noqonuniy harakatlari bo‘yicha, 16 tasi turli masalalarga oid.
DBQda qayd etilgan murojaatlar tahlili shuni ko‘rsatadiki, aksariyat hollarda jismoniy va yuridik shaxslarni bojxona rasmiylashtiruvi hamda imtiyozlar bilan bog‘liq masalalar qiziqtiradi. Jumladan, 2016-yil 10 oyi davomida kelib tushgan murojaatlarning 576 tasi yoki jami murojaatlarning 60 foizi aynan bojxona rasmiylashtiruvi yoxud bojxona to‘lovlaridan imtiyozlar qo‘llash masalalariga tegishli.
Masalan, Davlat bojxona qo‘mitasiga yozma ravishda murojaat qilgan “Sonora” kompaniyasi rahbari N.Yonassning murojaati ijobiy hal qilinib, unga tegishli tovarlarni rasmiylashtirish chog‘ida ortiqcha to‘langan 512 ming so‘mdan ortiq bojxona to‘lovi qisqa fursatda qaytarib berildi.
Davlat bojxona qo‘mitasi veb-sayti orqali murojaat yo‘llagan R.Fettayev o‘z murojaatida u faoliyat yuritayotgan “Asaka Kotton Impeks” MChJ xorijiy davlatdagi hamkori bilan tovarlarni eksport qilish bo‘yicha eksport shartnomasini imzolaganini ma’lum qilgan. Shartnoma imzolanib, “Angren” tashqi iqtisodiy faoliyat bojxona postida hisobga qo‘yiladi. Shu orada xorijiy sheriklarning bank rekvizitlari o‘zgargani bois tomonlar shartnomaga qo‘shimcha kelishuvni imzoladi. Ammo mazkur kelishuv avvalgi rekvizitlar asosida hisobga qo‘yilgani bois tadbirkorning tovari xorijga chiqmay turib qoladi. Mazkur murojaat zudlik bilan o‘rganib chiqilib, Tashqi savdo operatsiyalarining yagona axborot tizimidagi ma’lumotlarga tegishli tuzatishlar kiritiladi. Natijada tadbirkor murojaat qilgan kunning o‘zidayoq yuklarini xorijga eksport qilishga muvaffaq bo‘ldi.
Yagona interaktiv davlat xizmatlari portali orqali Navoiydan murojaat yo‘llagan “Navoiy pryaja” ishlab chiqaruvchi savdo firmasi direktori V. Jukova jun va sun’iy tolani qayta ishlash uchun 350 ming AQSh dolllari qiymatidagi yangi zamonaviy texnologik asbob-uskunalarni olib kirmoqchi ekanligini ma’lum qiladi va mazkur tovarlarning bojxona rasmiylashtiruvini amalga oshirishda amaliy yordam so‘raydi. V. Jukovaning murojaati o‘z vaqtida ko‘rib chiqilib, “Navoiy” tashqi iqtisodiy faoliyat bojxona posti tomonidan mazkur tashkilotga tegishli yuklarning bojxona rasmiylashtiruvi qisqa fursatda amalga oshirildi. Eng muhimi, mazkur jarayonlarda unga bojxona to‘lovlaridan 213 million so‘mdan ortiq miqdorda bojxona imtiyozlari qo‘llanildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)