«Толибон» ҳаракати ва Афғонистон ҳукумати махфий равишда тинчлик музокараларини қайтадан бошлади. Бу ҳақда «ТАСС» хабар бермоқда.
The Guardian нашрининг ҳам «Толибон», ҳам Афғонистон ҳукуматидаги манбаларга асосланиб хабар беришича, сентябрь ойида ва октябрь бошида Қатарда бўлиб ўтган музокараларда ҳаракат асосчисининг укаси мулла Абдул Маннон, расмий Кобул томонидан эса Афғонистон разведкаси раҳбари қатнашган.
Газетанинг қайд этишича, бу 2016 йил май ойида АҚШ учувчисиз учар қурилмаси зарбаси оқибатида «Толибон» етакчиси мулла Ахтар Муҳаммад Мансур йўқ қилинганидан бери Афғонистон расмийлари ва «Толибон» вакиллари ўртасида ўтказилган илк музокаралардир.
«Толибон» вакилининг The Guardian’га маълум қилишича, сентябрдаги учрашув «ижобий руҳда ва ортиқча қийинчиликларсиз» ўтган. Мазкур музокаралар ҳозирча расман тасдиқланганича йўқ.
«Толибон» ҳаракатидаги манбанинг қўшимча қилишича, учрашувда америкалик дипломат ҳам қатнашган. АҚШнинг Афғонистондаги элчихонаси мазкур ахборот юзасидан изоҳ беришдан бош тортган. Газета маълумотига кўра, музокараларда Покистондан вакиллар бўлмаган.
Афғонистон ҳукуматининг «Толибон» раҳбарияти билан сўнгги учрашуви 2015 йил июль ойида бўлиб ўтган эди, унда АҚШ ва Покистон вакиллари ҳам қатнашган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)