Xakerlar Hillari Klinton saylov shtabi boshlig‘ining pochtasini buzib kirdi. Jon Podestaning yozishmalari 7-oktabrdan beri WikiLeaks saytida e’lon qilib borilmoqda. Podestaning fikricha, uning pochtasini rus xakerlari buzib kirgan. Yozishmalarni kuzatib, Klintonning tvitlari ustida butun boshli jamoa ish olib borishini payqash mumkin. Xususan, Puerto-Rikoda yuz bergan inqiroz haqidagi 134 belgidan iborat xabarni bir vaqtning o‘zida 11 kishi muhokama qilgan.
Birinchi xabarni Hillari Klintonning maslahatchisi Enn O’Liri yozgan: “Hillari Klinton Puerto-Rikodagi qarz inqirozi haqida tvit yozmoqchi. Maqsad — tvit puertorikoliklarga hamdardlik ruhida bo‘lishi kerak. Biz ular bilan birga ekanimiz, ularning salomatligi va farovonligi bizni ham o‘ylantirishi anglashilishi kerak”.
U shunday tvit yozishni taklif qilgan: “Puerto-Rikodagi qarz inqirozi — faqat ularning muammosi emas. Biz mamlakat iqtisodiyotini barqarorlashtirish, uning o‘sishiga ta’sir ko‘rsatish va odamlarning yaxshi yashashiga yordam berish uchun hamkor bo‘lishimiz kerak”.
Bu tvit nafaqat o‘zbek tilida, balki ingliz tilida ham Twitter’dagi 140 belgilik cheklovga sig‘masdi, bu haqda Enn O’Lirining o‘zi ham xatida qayd etib o‘tgan. Xatning nusxasini u boshqa to‘qqiz maslahatchiga, xususan, Hillari Klintonning saylov shtabi boshlig‘i Jon Podestaga ham yuborgan.
Amanda Renteriya shunday javob beradi: uning fikricha, tvitda “‘asosiy muammolar’ hissiyoti” yetishmayapti. Shtab xodimlaridan biri Robbi Muk esa tvit mazmunini Puerto-Rikodagi ittifoqchilar bilan maslahatlashishni taklif qilgan. “Ha, men aynan shu masala ustida ishlayapman. Bir soatdan beri telefondaman”, — deya javob bergan Renteriya.
Jon Podesta ham o‘z taklifini bildirgan: “Bunday desak-chi: ‘Puerto-Rikodagi qarz inqirozi barcha amerikaliklarga daxl qiladi. Biz...”.
Bir necha soatlik muhokamalardan so‘ng tvit tayyor bo‘lgan. U shaxsan Hillari Klintonning imzosi bilan chiqqan. Tvitda 134 belgi bor (imzoni hisobga olmaganda).
Puerto Rico's debt crisis is not theirs alone. For PR's economy to grow & their people to thrive, they need real tools & real support. -H
— Hillary Clinton (@HillaryClinton) July 1, 2015
Meduza’ning yozishicha, 2012-yilgi prezident saylovi kampaniyasi vaqtida respublikachilardan nomzod Mitt Romnining tvitlari va ijtimoiy tarmoqlardagi boshqa chiqishlarini bir vaqtning o‘zida 22 nafargacha odam muhokama qilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)