AQSh Suriyadagi o‘t ochishni to‘xtatish rejimini qo‘llab-quvvatlash uchun Rossiya bilan yaratilgan ikki tomonlama kanallardan foydalanishni to‘xtatadi. Bu haqda AQSh Davlat departamenti matbuot xizmati rahbari Jon Kirbi ma’lum qildi, deb yozadi “TASS”.
“Qo‘shma Shtatlar Suriyada jangovar harakatlarni to‘xtatish rejimini qo‘llab-quvvatlash maqsadida o‘rnatilgan ikki tomonlama aloqa kanallaridagi ishtirokini to‘xtatadi. Bunday qarorga kelish oson bo‘lmadi”, — dedi u. Vashington Moskvani o‘z majburiyatlarini bajarmaganlikda ayblamoqda.
Bundan tashqari, AQSh Qo‘shma ijroiya markazini yaratishda qatnashishi kerak bo‘lgan xodimlarini ham chaqirib oladi. Amerikalik harbiylar Suriyada nizoli vaziyatlar yuzaga kelishiga yo‘l qo‘ymaslik uchun Rossiya mudofaa vazirligi bilan muloqot kanallaridan foydalanishda davom etadi.
Oq uy fikricha, Rossiya bilan Suriya bo‘yicha muzokaralarda tomonlarning “sabr kosasi to‘ldi”. AQSh prezidenti matbuot kotibi Joshua Ernest bu haqda jurnalistlar uchun brifingda ma’lum qildi.
“Bizning prezidentimiz eng boshidayoq aytgan ediki, Rossiya o‘z majburiyatlarini bajarmaguncha, o‘zi istagan narsaga erisha olmaydi, — dedi u. — Afsuski, bu shunday bo‘lib chiqdi”.
“Suriya bo‘yicha kelishuv nuqtai nazaridan AQSh va Rossiya muhokama qiladigan boshqa hech narsa qolmadi. Bu Suriya xalqi uchun fojiali holat”, — dedi Ernest.
Izoh (0)