АҚШ Суриядаги ўт очишни тўхтатиш режимини қўллаб-қувватлаш учун Россия билан яратилган икки томонлама каналлардан фойдаланишни тўхтатади. Бу ҳақда АҚШ Давлат департаменти матбуот хизмати раҳбари Жон Кирби маълум қилди, деб ёзади «ТАСС».
«Қўшма Штатлар Сурияда жанговар ҳаракатларни тўхтатиш режимини қўллаб-қувватлаш мақсадида ўрнатилган икки томонлама алоқа каналларидаги иштирокини тўхтатади. Бундай қарорга келиш осон бўлмади», — деди у. Вашингтон Москвани ўз мажбуриятларини бажармаганликда айбламоқда.
Бундан ташқари, АҚШ Қўшма ижроия марказини яратишда қатнашиши керак бўлган ходимларини ҳам чақириб олади. Америкалик ҳарбийлар Сурияда низоли вазиятлар юзага келишига йўл қўймаслик учун Россия мудофаа вазирлиги билан мулоқот каналларидан фойдаланишда давом этади.
Оқ уй фикрича, Россия билан Сурия бўйича музокараларда томонларнинг «сабр косаси тўлди». АҚШ президенти матбуот котиби Жошуа Эрнест бу ҳақда журналистлар учун брифингда маълум қилди.
«Бизнинг президентимиз энг бошидаёқ айтган эдики, Россия ўз мажбуриятларини бажармагунча, ўзи истаган нарсага эриша олмайди, — деди у. — Афсуски, бу шундай бўлиб чиқди».
«Сурия бўйича келишув нуқтаи назаридан АҚШ ва Россия муҳокама қиладиган бошқа ҳеч нарса қолмади. Бу Сурия халқи учун фожиали ҳолат», — деди Эрнест.
Изоҳ (0)