Bangladesh poytaxti Dakkadagi doimiy avtomobil tirbandliklari mamlakat hukumatini bir oila ega bo‘lishi mumkin avtomobillar soniga cheklov joriy etishga undamoqda. Avtomobil transporti vaziri Ubaydulla Qodirga ko‘ra, poytaxtdagi oilalar ikki mashina bilan kifoyalanishiga to‘g‘ri kelishi ehtimoldan holi emas, deya xabar beradi “TASS”.
“Har bir oilaga to‘g‘ri keladigan mashinalar sonini cheklash to‘g‘risidagi nizom avtotransport to‘g‘risidagi qonun loyihasiga kiritildi. Yaqin orada bu qonun yakuniy tasdiqlash uchun hukumatga taqdim etiladi, shundan so‘ng parlamentda muhokama etiladi”, — deydi vazir.
“Shoshilinch choralar ko‘rish zarur, chunki hozirning o‘zida Dakka dunyoning nafaqat odamlar, balki mashinalar ham eng zich joylashgan shaharlaridan biriga aylandi. Bu esa, o‘z navbatida, jiddiy iqtisodiy va ekologik muammolarga olib kelmoqda”, — deya ta’kidladi vazir.
Vazirlik ma’lumotlariga ko‘ra, poytaxtda avtomobil parkining o‘sish sur’ati umummiliy ko‘rsatkichlardan bir necha barobar ko‘p. Jumladan, 2015-yili Bangladeshda xarid qilingan 21 ming xususiy yengil avtomobildan 18,5 mingi Dakka hissasiga to‘g‘ri keldi.
Natijada o‘tgan yili xususiy mashinalar poytaxt ko‘chalaridagi 70 foizdan oshiq bo‘sh joyni egalladi, avtomobil tirbandliklari keltirayotgan zarar esa mamlakat yillik yalpi ichki mahsulotining salkam 6 foizini tashkil etmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)