Tehron 10-sentabr, shanba kuni Eron chegarasiga bevosita yaqin masofadan uchib o‘tgan Amerikaning ikkita razvedkachi samolyotini urib tushirishni aytib tahdid qildi. Bu haqda Fox News telekanali mudofaa sohasidagi uch nafar manbasiga tayanib ma’lum qildi, deb yozadi “RIA Novosti”.
Telekanal ma’lumotlariga ko‘ra, 10-sentabr kuni bortida to‘qqiz kishi bo‘lgan P-8 Poseidon va 24 kishilik ekipaji bo‘lgan EP-8 Eries samolyotlari Eron sohillaridan 13 mil uzoqlikda uchib o‘tdi (davlatning hududiy suvlari esa qirg‘oqdan 12 dengiz mili masofadan boshlanadi).
Parvoz chog‘ida eronlik harbiylar radio orqali amerikaliklarga ular urib tushirilishi mumkinligini ma’lum qilgan. Uchuvchilar ogohlantirishlarga e’tibor bermay, xalqaro havo hududida, Eron hududiga juda yaqin masofada, uchishda davom etgan.
Amerikalik harbiylar Tehronning xatti-harakatlarini “noprofessional” deb hisoblasa-da, Vashingtondagilar Eronning pozitsiyasi xavf tug‘dirgan-tug‘dirmaganiga amin emas, chunki ushbu tumanda raketaga qarshi mudofaa qurilmalari ko‘rinmagan.
Izoh (0)