AQSh prezidentligiga Demokratik partiyadan nomzod Hillari Klintonning shtabi jamoatchilikka uning salomatligi haqida xabar bermaslik qarori noto‘g‘ri bo‘lganini tan oldi, deb yozadi “RBK” Klintonning kampaniyasi matbuot kotibi Brayan Fellonga tayanib.
“Hodisani ko‘rib chiqib, aytishim mumkinki, biz buni yaxshiroq hal qila olishimiz mumkin edi, biz axborotni tezkorroq taqdim etishimiz kerak edi. Bu bizning aybimiz, va biz bundan afsusdamiz”, — dedi Fellon.
Uning so‘zlariga ko‘ra, (11-sentabr teraktlari qurbonlari xotirasiga bag‘ishlangan motam tadbiri chog‘ida oyog‘ida zo‘rg‘a turgan Klintonni mashinaga o‘tirg‘izishayotgani aks etgan video e’lon qilinganidan keyingi) 90 daqiqa davomida shtabdagilar prezidentlikka nomzodning ahvoli joyidaligiga ishonch hosil qilish bilan band bo‘lgan.
U shtab yaqin bir necha kun ichida Klinton haqidagi qo‘shimcha “tibbiy ma’lumot”ni oshkor qilish niyatida ekanligini qo‘shib qo‘ydi.
Dastlab, nomzodning shtabida motam tadbiridagi hodisani “ortiqcha qizib ketish” bilan izohlashdi. Ammo keyinroq Reuters agentligi 9-sentabrdayoq Klintonning shifokori unga pnevmoniya tashxisini qo‘yganini, nomzodning mazasi qochishiga antibiotiklar va suvsizlanish birgalikda sabab bo‘lganini xabar qildi.
Eslatib o‘tamiz, Hillari Klinton 11-sentabr teraktlariga bag‘ishlangan motam marosimida o‘zini noxush his etdi va Kaliforniya hamda Nevadaga saylovoldi safarlarini bekor qildi.
Izoh (0)